"Otbasy banki" biryńǵaı jınaqtaýshy zeınetaqy qorynan zeınetaqynyń shekti mólsherin alýǵa kelip túsken ótinishterdiń qanshasy maquldanǵany týraly aqparat jarıalady.

Bank aqparatynsha, qazirgi ýaqytta 22 300 adamnyń birjolǵy zeınetaqy tólemderin alý týraly ótinishteri maquldanǵan.

"Otbasy banki" 23 qańtardan bastap biryńǵaı jınaqtaýshy zeınetaqy qorynan tólenetin birjolǵy zeınetaqy tólemderin paıdalanýǵa ótinish tapsyra alatyn arnaıy onlaın platformany iske qosqan. 

Ótinimdi noýtbýk/kompúter arqyly joldaýǵa bolady. Smartfon arqyly ótinim berilmeıdi. Ótinimdi joldaý úshin ESQ bolýy kerek.

2 qańtar kúni prezıdent Qasym-Jomart Toqaev azamattarǵa zeınetaqy jınaǵynyń bir bóligin merziminen buryn paıdalanýǵa múmkindik beretin zańǵa qol qoıǵan.

Azamattar ózderiniń zeınetaqy jınaqtarynyń bir bóligin tómendegideı maqsattarǵa paıdalana alady:

♦ Kepildik bolǵan kezde turǵyn úı qurylysyna úlestik qatysý týraly sharttar boıynsha turǵyn úı satyp alý kezinde nemese akt bolǵan kezde kóppáterli turǵyn úıdegi úlesti berý týraly shart jasasý kezinde;

♦ Jer ýchaskesin satyp alýdy qosa alǵanda jeke turǵyn úı salý úshin tolyq esep aıyrysý kezinde;

♦ Ipoteka alý, turǵyn úıdi satyp alý, bereshekti óteý, bankter arqyly ıpotekany qaıta qarjylandyrý úshin bastapqy jarna retinde;

♦ Turǵyn úı qurylysy jınaqtary júıesi boıynsha jer ýchaskesin satyp ala otyryp, turǵyn úı satyp alýǵa nemese jeke turǵyn úı salýǵa arnalǵan ıpoteka boıynsha bereshekti alý, qaıta qarjylandyrýdy óteý kezinde;

♦ Islam bankiniń qarjylandyrýy sheńberinde úı satyp alý jáne osyndaı qarjylandyrý boıynsha bereshekti óteý kezinde;

♦ Turǵyn úı qurylysy jáne daǵdarysqa qarsy baǵdarlamalar sheńberinde satyp alý quqyǵymen berilgen baspanany uzaq merzimdi jaldaý sharttary boıynsha bereshekti óteý úshin paıdalanýyna ruqsat etiledi.

Jınaqtyń bir bóligin paıdalaný úshin qordaǵy jınalǵan soma azamattardyń jas ereksheligine qaraı belgilengen shekten asýǵa tıis.