«Nur Otan» partıasy saılaýaldy ýádelerin júzege asyrýǵa qyzý kirisip ketti. Ol úshin búginde arnaıy Jol kartalary ázirlenip jatyr. Bul týraly «Nur Otan» partıasy Tóraǵasynyń birinshi orynbasary Baýyrjan Baıbek Facebook jelisindegi óz paraqshasynda arnaıy jazba jarıalady. 

«Qurmetti dostar! Elimizdiń barlyq aýdandarynda, qalalary men oblystarynda jańa shaqyrylymdaǵy máslıhattardyń birinshi sesıalary ótti. Bizdiń fraksıalarymyz saılaý qorytyndylary boıynsha barlyq deńgeıdegi ókildi organdardyń basym bóligin qalyptastyryp, mandattardyń jalpy sanynyń ortasha alǵanda 80%-ten astamyn qurady. 

Partıamyzdyń depýtattyq korpýsy alǵashqy kúnnen bastap saılaýaldy ýádelerdi iske asyrýǵa kiristi. Sonymen, «Nur Otan»-nyń saılaýaldy baǵdarlamalarynyń negizinde 2025 jylǵa deıingi 216 aýmaqtyq damý baǵdarlamasy bekitildi. 

Bizdiń saılaýaldy basymdyqtarymyz «Halyq únine qulaq asatyn memleket» tujyrymdamasyn iske asyrý aıasynda halyqpen, onyń ishinde shalǵaı eldi mekender turǵyndarymen jan-jaqty talqylaý qorytyndysy boıynsha qalyptastyryldy. Tek praımerız barysynda ǵana biz azamattardan 20 myńnan astam usynys jınadyq. Budan bólek úgit-nasıhat kezdesýleri kezeńinde taǵy 42 myńnan asa amanat tústi. Olardyń 65%-ten astamy aımaqtyq baǵdarlamalardy bekitý kezinde eskerildi. 

Elbasy, partıa Lıderi Nursultan Nazarbaev aıtqandaı, «Nur Otan» depýtattary árbir óńirde, qala men aýdanda barlyq saılaýaldy mindettemelerdiń oryndalýyna júıeli baqylaýdy qamtamasyz etýi tıis»- dep jazdy ol. 

Onyń aıtýynsha, qazir daıyndalyp jatqan Jol kartalary kópshilik nazaryna usynylatyn bolady. 

«Árbir baǵyt boıynsha nysanaly ındıkatorlar men merzimder qoıylyp, jaýapty oryndaýshylar belgilenedi. Úkimetpen jáne jergilikti atqarýshy organdarmen birlesip, bir aı ishinde árbir jylǵa naqty kórsetkishteri bar tıisti jol kartalary ázirlenip, jarıa túrde qaraýǵa usynylady. 

El Prezıdenti Qasym-Jomart Toqaev atap kórsetkendeı, «Ózgerister joly: Ár azamatqa laıyqty ómir!» saılaýaldy baǵdarlamasy elimizdiń áleýmettik damýyn ilgeriletýge jáne halyqtyń ál-aýqatyn arttyrýǵa baǵyttalǵan naqty sharalardyń tıimdi keshenin usynady. 

Maqsaty aıqyn, naqty ister partıasy retinde «Nur Otan» barlyq deńgeıde óziniń saılaýaldy ýádelerin iske asyrýdy qamtamasyz etedi! Qıyndyqty eńserip, jeńiske birge jetemiz!»,- dedi B.Baıbek.