Memleket basshysynyń tapsyrmasyna sáıkes 2021 jyldyń 1 qańtarynan bastap balabaqshalar, mektepter men kolejderdegi dene shynyqtyrý muǵalimderiniń aılyǵyna jańa qosymsha aqy taǵaıyndaldy. Bul týraly Bilim jáne ǵylym mınıstri Asqat Aımaǵambetov áleýmettik jelidegi paraqshasynda jazdy.

– Endi dene shynyqtyrý muǵalimderiniń eńbekaqysyna aı saıyn qosymsha 17 697 teńge tólenetin bolady. Osy rette dene shynyqtyrý muǵalimderiniń fýnksıonaly keńeıip otyr. Muǵalimder ádette ótkizetin dene shynyqtyrý sabaqtarynan bólek, qosymsha sporttyq-saýyqtyrý sabaqtaryn, ıaǵnı seksıalar ótkizetin bolady, – dedi mınıstr.

Onyń aıtynsha ár muǵalim qosymsha seksıalyq sabaqtar ótkizedi jáne balalar mekteptegi qajetti jabdyqtarynyń bolýyna baılanysty túrli sport seksıalaryna qatysa alady.

– Balalardy sport seksıalary arqyly qosymsha sabaqtarǵa tartý – salaýatty ómir saltyn qalyptastyrý, bilim alýshylardy sportqa baýlý jáne olardyń densaýlyǵyn nyǵaıtý boıynsha berilgen Memleket basshysy Q. K. Toqaevtyń tapsyrmalarynyń sheńberinde basqa da keshendi sharalar qabyldanady, – dep jazdy Aımaǵambetov jelidegi paraqshasynda.