Premer-mınıstr Asqar Mamın jumys saparymen Mańǵystaý oblysyna bardy, dep habarlady primeminister.kz saıty.

Resmı saıttyń málimetinshe, úkimet basshysy sapary aıasyndaǵy kezdesýlerde Jańaózen qalasynda qýattylyǵy 1 mlrd tekshe metrge deıin bolatyn jańa gaz óńdeý zaýytyn salý, óńirdiń qoldanystaǵy magıstraldyq jáne taratýshy gaz jelilerin rekonstrýksıalaý máseleleri talqylanǵan.

"Mańǵystaý oblysynyń halqyn aýyz sýmen qamtamasyz etý sheńberinde "Kaspıı" tushshylandyrý zaýytyn qaıta jańartý jáne keńeıtý (ónimdiligi táýligine 40 myń tekshe metrge deıin arttyrylatyn bolady), "Qarajanbas" qýatyn táýligine 17 myń tekshe metrge ulǵaıtý, Jańaózen qalasyn sýmen qamtamasyz etý máselelerin sheshetin jáne qýaty táýligine 50 myń tekshe metrge jetetin "Kendirli" tushshylandyrý zaýytyn salý júzege asyrylady. Qosymsha sýmen jabdyqtaý men kárizdiń jańa jelileri salynady, KTQ qaıta jańartylyp, jalpy qýaty táýligine 70 myń tekshe metrge deıin jetkiziledi" delingen habarlamada.

Sondaı-aq Mańǵystaý oblysy halqynyń jumyspen qamtylýyn qamtamasyz etý jáne tabysyn arttyrý, eńbek naryǵynyń qazirgi jaǵdaıyn eskere otyryp, týrısik sektor úshin jergilikti kadrlardy daıarlaý máseleleri talqylanǵan.

– Jańa jumys oryndaryn qurýǵa, halyqtyń turmys sapasy men ál-aýqatyn arttyrýǵa yqpal etetin damýdyń jańa jobalaryna ınvestısıa tartý kólemin ulǵaıtý qajet, –  dedi A. Mamın.

Jumys sapary aıasynda úkimet basshysy Aqtaý qalasynyń kýrorttyq aımaǵyn damytý jobalarynyń (Fairmont, Double Tree by Hilton, Aqualina Resort brendterimen qonaq úıler, taqyryptyq oıyn-saýyq parki) iske asyrylýyn tekserip, josparlanǵan ınfraqurylym qurylysynyń ýaqytyly aıaqtalýyn qamtamasyz etýdi tapsyrdy.