Qazaqstannyń bas sanıtar dárigeri Erlan Qıasov pen densaýlyq saqtaý vıse-mınıstri Ajar Ǵınıat koronavırýsqa qarsy "Sputnik V” vaksınasyn saldyrdy.

Vaksınasıa Nur-Sultandaǵy №6 qalalyq emhanada ótti. Vaksınany aldymen Erlan Qıasov, odan keıin Ajar Ǵınaıat saldyrdy. Ekpeden keıin olar 30 mınýt boıy dárigerler baqylaýynda bolady.

– Men ózimdi jaqsy sezinip turmyn. Birinshi dozany alǵan soń karantınge oqshaýlanýdyń qajeti joq. Men qazir jumysqa baramyn. Vaksınadan keıingi kútimdi ustanýǵa tyrysamyn. Degenmen barshańyzdy karantın rejımin saqtaýǵa shaqyrǵym keledi, – dedi Qıasov.

Densaýlyq saqtaý vıse-mınıstri Ajar Ǵınıat vaksına salarda esh ýaıymdamaǵanyn jetkizdi.

– Men únemi vaksına alamyn. Bul – eń tıimdi qorǵanys quraly, sondyqtan vaksınaǵa qol jetkizgen alǵashqy elderdiń biri bolǵanymyzǵa qýanýymyz kerek. Jeke ózim vaksına arqyly medısına mamandaryn, tutas halyqty qorǵaı alatynymyzǵa qýandym.

Vaksına salarda da esh ýaıymdaǵan joqpyn. Óıtkeni men dárigermin jáne vaksınalyq preparattardyń artyqshylyqtary men keri áserlerinen habardarmyn, – dedi Ajar Ǵınıat.

Eske sala keteıik, prezıdent Qasym-Jomart Toqaevtyń tapsyrmasy boıynsha búginnen bastap Qazaqstanda koronavırýsqa qarsy "Sputnik V" vaksınasyn erikti túrde salý bastaldy.