2021 jyldan bastap joǵary oqý oryndary jeke úlgidegi dıplomdar beretin bolady. Bul týraly bilim jáne ǵylym vıse-mınıstri Mıras Dáýlenov habarlady.

– Jeke úlgidegi dıplomdar jumys berýshilerge maman daıarlaý sapasyn baǵalaýǵa múmkindik beredi. Dıplomdarda joǵary oqý orny, bilim berý baǵdarlamasynyń ataýy, bitirýshiniń derekteri, oqytý nysany kórsetilýge tıis. Berilgen dıplomǵa derbes jaýapty bolatyn rektordyń qoly bolýǵa tıis. BǴM jasaǵan biregeı sáıkestendirý nómiri bolady, – dedi vıse-mınıstr.

Ol óz sózinde ár dıplomda qorǵanys belgileri bolýy kerektigin jetkizdi.

– Joǵary oqý ornynyń osy oqý ornynda oqymaǵan, bilim berý baǵdarlamasyn aıaqtamaǵan adamǵa dıplom berýi lısenzıadan aıyrý jáne akredıtteýdi keri qaıtaryp alýǵa negiz bola alady. Jeke úlgidegi dıplomdardy qoldan jasaý resmı qujattardy qoldan jasaý bolyp sanalady. Mundaı áreket úshin Qylmystyq kodekstiń 385-baby boıynsha jaýapkershilik kózdelgen, – dep jazdy jelidegi jazbasynda.