Atestattaýǵa qujattardy tapsyrý prosesin elektrondy formatqa kóshirý kerek. Bul týraly búgin bilim jáne ǵylym mınıstri Asqat Aımaǵambetov apparat jınalysynda aıtty.

– Atestattaý – pedagogtardyń kóp kóteretin máselesiniń biri. Kúni keshe jınalysta atestattaýǵa qujattardy tapsyrý prosesin elektrondy formatqa tolyǵymen kóshirýimiz kerek ekenin talqyladyq. Jalpy muǵalimder atestattaýǵa qatysý úshin ózderiniń ulttyq bilim berý derekter qoryndaǵy (NOBD / UBBDQ) portfolıosynyń betine áleýmettik jelidegideı barlyq aqparatty jınaýǵa tıis. Olar eshteńeni tapsyrmaýy kerek. Biz ár muǵalimniń óziniń portfolıosyn avtomatty túrde alyp, tıisti atestattaýdan ótkizetindeı jaǵdaı jasaýymyz kerek. Bul máseleniń bárin bıyl bitirýimiz kerek, – dedi mınıstr.