Prezıdent, qarýly kúshterdiń joǵarǵy bas qolbasshysy Qasym-Jomart Toqaev qorǵanys mınıstri Nurlan Ermekbaevty qabyldady, dep habarlady Aqorda saıty.

Nurlan Ermekbaev Toqaevqa Qazaqstan armıasynyń zamanaýı qarý-jaraqtarmen jáne tehnıkamen jabdyqtalýy, ınfraqurylymdyq  damýy, sıfrlandyrylýy, aqparattyq qaýipsizdiktiń  qamtamasyz etilýi jáne bitimgershilik bólimderdiń daıyndyǵy týraly aıtty.

Qorǵanys mınıstri damyǵan memleketter armıasynyń qurylymyna jasalǵan taldaý jumystaryn eskere otyryp, Qorǵanys mınıstrligi "Armıany jańǵyrtý" jobasyn usynatynyn habarlady. Ulttyq jobanyń júzege asyrylýy armıanyń áskerı áleýetin arttyrýǵa, belgili bir dárejede áleýmettik-ekonomıkalyq tıimdiligin qamtamasyz etýge zor múmkindik beretinin atap ótti.

Sonymen qatar ol prezıdentke beıbitshilikti qoldaý operasıalaryna qatysatyn áskerı qyzmetshilerdiń daıyndyǵy týraly aqparat berdi.

Nurlan Ermekbaevtyń aıtýynsha, prezıdent Qasym-Jomart Toqaevtyń tapsyrmalaryn iske asyrý aıasynda BUU mısıasy baǵytyndaǵy qyzmette meılinshe suranysqa ıe áskerı-medısınalyq, ınjenerlik, barlaý jáne áskerı polısıa sıaqty bólimderdiń daıyndyǵy pysyqtalýda.

Kezdesý sońynda joǵarǵy bas qolbasshy Qarýly Kúshterdiń áskerı áleýetin arttyrýǵa jáne qazirgi syn-qaterler men qaýipterdi eskere otyryp, olardy sapaly damytýǵa, armıany jabdyqtaýǵa, Qazaqstanda qarý-jaraqtyń birneshe túrin shyǵaratyn qorǵanys-ónerkásiptik keshenimen yqpaldastyq ornatýǵa, sondaı-aq, Qarýly Kúshterdi sıfrlandyrýǵa qatysty birqatar tapsyrma berdi.