Erlan Turǵymbaev ishki ister mınıstrligi júıesinde 2021 jyldyń "Quqyq buzýshylyqtyń aldyn alý jyly" dep jarıalanǵanyn aıtyp, ishki ister organdaryn reformalaý jónindegi jobalardyń júzege asyrylýyna egjeı-tegjeıli toqtaldy. Atap aıtqanda jumystyń servıstik modelin engizý, "jurtqa jaqyn polısıa" qaǵıdatyn qamtamasyz etý, ýchaskelik ınspektorlar qyzmetin reformalaý jóninde sóz boldy.

Memleket basshysyna ishki ister organdarynyń qyzmetin sıfrlandyrýǵa qatysty jobalar, azamattarǵa polısıamen jedel baılanys ornatýǵa múmkindik beretin "Police 102" mobıldik qosymshasyn iske qosýdyń alǵashqy nátıjeleri týraly baıandaldy.

Prezıdent azamattardyń polısıaǵa degen senimin arttyrýda aıtarlyqtaı jetistikke qol jetkizýge múmkindik beretin sapaly reforma júrgizý qajettigine basa mán berdi.

Osy rette ishki ister mınıstri kadrlardy irikteý júıesiniń jetildirilip jatqany, jańa biliktilik talaptarynyń bekitilgeni, sybaılas jemqorlyqqa qarsy ımýnıtettiń qalyptasýy, ıdeologıalyq jáne ımıjdik jumystardyń kúsheıtilgeni jaıynda málimet berdi.

Budan bólek prezıdentke qylmystyq-atqarý júıesin jańǵyrtý, jazasyn óteýshilerdiń jaǵdaıyn jaqsartý jáne olardy jumyspen qamtý, sondaı-aq, kolonıalarda jappaı beınebaqylaý qurylǵylaryn ornatý boıynsha qabyldanyp jatqan sharalar týraly baıandaldy.