Ál-Farabı atyndaǵy QazUÝ men Gýmılóv atyndaǵy Eýrazıa ulttyq ýnıversıtetiniń rektorlary taǵaıyndaldy. Bul týraly bilim jáne ǵylym mınıstrliginiń baspasóz qyzmeti habarlady.

Saıt málimetinshe, 2021 jyly 5 aqpan kúni "ál-Farabı atyndaǵy qazaq ulttyq ýnıversıteti" komersıalyq emes aksıonerlik qoǵamynyń dırektorlar keńesi basqarma tóraǵasy - rektor laýazymyna úmitker bolǵan kandıdatýralardy qarastyrǵan.

Atalǵan laýazymǵa úmitkerler JOO damytý baǵdarlamalaryn daıyndap, QazUÝ dırektorlar keńesiniń múshelerine tanystyrdy. Nátıjesinde konkýrsqa qatysqan birneshe úmitkerdiń ishinen Janar Amangeldiqyzy Temirbekova men Janseıit Qanseıituly Túımebaevtyń kandıdatýrasy respýblıkalyq komısıanyń qaraýyna usynyldy.

"QR premer-mınıstriniń orynbasary Eraly Toǵjanov tóraǵalyq ótken respýblıkalyq komısıa dırektorlar keńesi usynǵan kandıdattarmen áńgimelesý ótkizip,  "ál-Farabı atyndaǵy qazaq ulttyq ýnıversıteti" komersıalyq emes aksıonerlik qoǵamynyń basqarma tóraǵasy – rektory laýazymyna Janseıit Qanseıituly Túımebaevty tańdady" delingen habarlamada.

Aıta keteıik, QazUÝ dırektorlar keńesiniń quramyna táýelsiz dırektor retinde Rahman Alshanov, Kúnsulý Zákarıa, Nurlan Smaǵulov, Erkin Tátishev, Armanjan Baıtasov jáne basqa azamattar kiredi.

Dál sol kúni "L.N. Gýmılev atyndaǵy Eýrazıa ulttyq ýnıversıteti" komersıalyq emes aksıonerlik qoǵamynyń dırektorlar keńesi basqarma tóraǵasy –rektor laýazymyna úmitker retinde konkýrsqa qatysqan bes azamat ázirlegen ýnıversıtetti damytý boıynsha baǵdarlamalaryn qarastyrdy. Daýys berý nátıjesinde respýblıkalyq komısıanyń qaraýyna Sáýle Kóshkenqyzy Amandyqova men Erlan Battashuly Sydyqovtyń kandıdatýralary usynyldy.

"Premer-mınıstrdiń orynbasary Eraly Toǵjanov tóraǵalyq etken respýblıkalyq komısıa dırektorlar keńesi usynǵan úmitkerlermen áńgimelesý ótkizip, "L. N. Gýmılev atyndaǵy EUÝ" komersıalyq emes aksıonerlik qoǵamynyń basqarma tóraǵasy - rektory laýazymyna Erlan Battashuly Sydyqovty tańdady" delingen habarlamada.

JOO dırektorlar keńesiniń quramyna táýelsiz dırektor retinde Murat Ábenov, Qanat Nurov, Álıhan Báımenov, Danıar Áshimbaev, Aleksandr Van De Pýtt jáne basqa da azamattar kiredi.