Májiliste "Eńbek kodeksine qashyqtyqtan jumys isteýdi quqyqtyq retteýdi jetildirý máseleleri boıynsha ózgerister men tolyqtyrýlar engizý týraly" zań jobasy tanystyryldy. Jobaǵa parlament depýtattary bastamashy bolǵan. Bul týraly tómengi palatanyń otyrysynda aıtyldy.

Quqyqtyq jáne áleýmettik-ekonomıkalyq oń nátıjeler kútiletin zań jobasy boıynsha qorytyndy bıylǵy 22 jeltoqsanǵa deıin ázirlenedi.

Áleýmettik-mádenı damý komıtetiniń tóraǵasy Jámılá Nurmanbetova qyzmetkerlerdi qashyqtan jumys isteýge aýystyrý tájirıbesi eńbek zańnamasyn jetildirý qajettigin kórsetkenin aıtty.

– Osyǵan baılanysty zań jobasy qashyqtan jumys isteýge baılanysty eńbek qatynastaryn retteýdi kózdeıdi, – dedi depýtat.

Zań jobasynda ýaqytsha jáne aralas jumys rejımin engizý, jumys kestesi, jumys ýaqyty, qyzmetker men jumys berýshiniń jaýapkershiligin belgileý syndy normalar bar.

Aıta ketsek, byltyr kóktemde pandemıa bastalǵannan keıin qazaqstandyqtardyń 70 paıyzy qashyqtan jumys isteýge kóshken.