Prezıdent Qasym-Jomart Toqaev Aýǵanstan prezıdenti Ashraf Ǵanımen telefon arqyly sóılesti, dep habarlady Aqorda saıty.

Saıttyń málimetinshe, áńgimege Aýǵan tarapy bastamashyl bolǵan. Qazaqstan men Aýǵanstan basshylary ekijaqty yntymaqtastyqtyń qazirgi ahýaly men keleshek perspektıvalaryn talqylaǵan.

Aýǵanstan prezıdenti Qazaqstannyń aýǵan ishindegi dıalogty turaqty túrde qoldap, elimizdiń keń kólemde ekonomıkalyq kómek kórsetip kele jatqany úshin alǵys aıtty. Qasym-Jomart Toqaev elimizdiń Aýǵanstanǵa aldaǵy ýaqytta da jan-jaqty qoldaý kórsete beretinin rastady.

Memleket basshysynyń aıtýynsha, Qazaqstan Aýǵanstannyń qaýipsizdigin qamtamasyz etý, ekonomıkasy men áleýmettik ınfraqurylymyn qaıta qalpyna keltirý jónindegi halyqaralyq jáne aımaqtyq forýmdardyń jumysyna belsendi túrde qatysady.

Qasym-Jomart Toqaev Aýǵanstanmen aradaǵy jan-jaqty baılanystardy jandandyrý maqsatynda erekshe tapsyrmalar boıynsha elshi dárejesindegi arnaıy ókil ınstıtýty qurylǵanyn atap ótti. Osy jyldyń birinshi jartysynda Qazaqstanǵa úkimettik delegasıa keledi. Prezıdentter osy kezdesý barysynda naqty máseleler men yntymaqtastyqtyń basqa da baǵyttary boıynsha dıalogty odan ári jalǵastyrý jóninde ýaǵdalasty.

Qasym-Jomart Toqaev Ashraf Ǵanıdi úkimettik delegasıalar jasaıtyn kelissózderdiń nátıjelerin bekitý jáne Qazaqstan men Aýǵanstan arasyndaǵy ózara is-qımyldyń keleshegin talqylaý úshin elimizge resmı saparmen kelýge shaqyrdy.