Májiliste Palata Spıkeri, «Nur Otan» partıasy parlamenttik fraksıasynyń jetekshisi Nurlan Nyǵmatýlınniń tóraǵalyǵymen fraksıanyń keńeıtilgen otyrysy ótti.

Onda Úkimettiń jáne «Nur Otan» partıasynyń Májilistegi Fraksıasynyń «Nur Otan» partıasynyń 2025 jylǵa deıingi «Ózgerister joly: ár azamatqa laıyqty ómir!» Saılaý baǵdarlamasyn oryndaýdyń Jol kartasyn iske asyrý jónindegi birlesken jumysy týraly aıtyldy.

Jıynǵa Premer-mınıstr Asqar Mamın, «Nur Otan» partıasy Tóraǵasynyń Birinshi orynbasary Baýyrjan Baıbek jáne Úkimet músheleri qatysty.

Elbasynyń 14 qańtarda partıanyń saılaýaldy baǵdarlamasyn oryndaý jónindegi «Jol kartasyn» ázirlep, jarıa túrde qaraýdy júktegen tapsyrmasy týraly aıtqan Májilis Tóraǵasy:

– Partıa Tóraǵasy, Elbasy Nursultan Ábishuly Nazarbaev atap ótkendeı, bul baǵdarlama osy jyldarda jasalǵa reformalardyń zańdy jalǵasy. Sonymen birge, bul qujat – búkil elimizdi jańǵyrtý jáne barsha qazaqstandyqtardyń ómirin jaqsartýdyń  naqty jospary, – dedi.

Májilis Spıkeri baǵdarlamany iske asyrýǵa qajetti qarajattardyń kózdelgenin atap ótip, depýtattar syrtqy jáne ishki naqty jaǵdaılardy eskere otyryp, kezekti respýblıkalyq búdjet jobasyn qaraý kezinde halyq aldyndaǵy mindettemelerdi qarjylandyrý úshin qajetti túzetýlerdi engizýge daıyn ekenin jetkizdi.

Otyrys barysynda, Nurlan Nyǵmatýlın:

«Elbasymyzdyń «Jol kartasyn» ázirleý týraly tapsyrmasyna sáıkes, kóptegen jumystar atqarylǵanyn kórip otyrmyz. Oǵan fraksıa depýtattary da, Úkimet músheleri de, partıa ókilderi de belsendi qatysty. Aldaǵy josparlarymyz, maqsattarymyz belgili. Endi osy baǵytta jumysymyzdy odan ári  jalǵastyratyn  bolamyz» - dedi.

«Jol kartasy» partıanyń naqty maqsattarǵa baǵyttalǵanyn jetkizgen Palata Spıkeri saılaýaldy baǵdarma halyqtyń barlyq sanatyn qamtyǵanyn aıta kele:

«Sonymen birge, áleýmettik qamtamasyz etý, bilim, densaýlyq, aýylsharýashylyǵy, ónerkásip, shaǵyn jáne orta bıznesti damytýǵa jańa qadam   jasalyndy.  Osy baǵdarlamada otbasyn, áıel azamattardy,  jastardy  qoldaýǵa da erekshe kóńil bólindi. Osy maqsattarǵa jetý úshin «Jol kartasynyń» árbir tarmaǵynyń oryndalýyn qatań baqylaý qajet.Bul Elbasymyzdyń qańtardyń ortasynda bizge bergen  tapsyrmasy» - dedi.

Bul rette «Jol kartasynyń» barlyq baǵyttary Májilistiń komıtetteri arasynda bólingen. Al «Jol kartasynyń» naqty tarmaqtaryna baqylaýdy kúsheıtý úshin «Nur Otan» fraksıasynyń depýtattary bekitildi. Sonymen qatar, depýtattar baǵdarlama tarmaqtarynyń oryndalýy týraly aqparat berýge derbes jaýapty memlekettik organdardan da anyqtaýdy usyndy. Kem degende, bul vıse-mınıstr deńgeıinde bolýy kerek.

Jıyndy qorytyndylaǵan Májilis Tóraǵasy:

Bul «Jol kartasy»  – árbir oblysty, árbir aýdandy árbir aýyldy jáne barlyq halyqty qamtıdy. Alǵa qoıǵan mindetterdi, ashyq, sapaly, tıimdi oryndaýǵa keń  jol ashady. Sebebi, onda Partıamyzdyń Tóraǵasy,  Elbasymyz Nursultan Ábishuly Nazarbaevtyń tapsyrmasyna sáıkes, barlyq sala boıynsha, ásirese, áleýmettik suraqtardy sheshýdiń naqty  sharalary   kórsetildi.