Eldegi  İİM qarasty Krımınaldyq polısıa departamenti bastyǵynyń orynbasary Qanat Nurmaǵambetov zańsyz onlaın nesıeler qalaı rásimdeletinin onlaın rejımdegi brıfıńte aıtty.

Aıtýynsha, ınternet alaıaqtardy anyqtaý úshin bıylǵy 9-11 aqpan aralyǵynda «Anti-Fraud» operasıasy ótkizilgen. Nátıjesinde 300-den astam qylmys tirkelip, buryn jasalǵan 289 alaıaqtyq qylmys ashylǵan.

Alaıaqtyqtyń kóp tirkelegen túri – ınternet alańdarda taýar satý nemese qyzmet kórsetý.  Sondaı–aq  bank kartalary men depozıtterdegi qarjyny zańsyz ıemdený úshin jeke málimetterdi alýdyń basqa da tásilderi tirkelip jatqanyn aıtty.

–Shymkent qalasynyń turǵyny áleýmettik jelilerde tabylǵan jeke qujattar týraly habarlandyrýlardy izdegen. Jeke kýálik fotosýretterinen tıisti málimetterdi alǵannan keıin, túrli oblystar turǵyndarynyń atyna 50-ge tarta onlaın nesıe rásimdegen, - dedi Q. Nurmaǵambetov.