Túrkistan oblysynyń polıseıleri qarý qoldanyp, buzaqylyq jasaǵan kúdiktilerdi ustady, dep habarlady oblystyq polısıa departamentiniń baspasóz qyzmeti.
Qazyǵurt aýdandyq polısıa bólimshesiniń kezekshi bólimine ýchaskelik ınspektorlardan bos jaıylymdardyń birinde bolǵan kezekti kókpardy toqtatý kezinde belgisiz tulǵalardyń tarapynan qarý qoldaný arqyly buzaqylyq bolǵany boıynsha habarlama kelip tústi. Atalǵan jaıtty Qazyǵurt polıseıleri qylmystyq kodekstiń 293-baby 3-bóligi "buzaqylyq" boıynsha SDTBT-ǵa tirkep, jedel-izdestirý is-sharalaryna kiristi.
"Jedel júrgizilgen arnaıy operasıa nátıjesinde Túrkistan oblysy polısıa departamenti krımınaldyq polısıa basqarmasynyń qyzmetkerleri Túrkistan oblysy UQKD jáne ulttyq ulannyń "Búrkit" arnaıy jasaǵymen birlesip, Qazyǵurt kenti kósheleriniń birinde "VAZ" markaly avtokólikti toqtatyp, 4 kúdiktini ustady. Ustalǵan Qazyǵurt aýdanynyń 4 jas turǵyny polısıa bólimine jetkizildi" delingen habarlamada.
Departament málimetinshe, kúdiktilerdi tintý kezinde polıseıler sómkeni taýyp alyp, odan zattaı dálel retinde 16 kalıbrli sholaq myltyq pen oq-dárilerdi tárkilegen. Jedel ýákilder kúdiktilerdiń úıin odan ári tintý kezinde qosymsha 16 kalıbrli ańshylyq myltyq pen eki travmatıkalyq tapanshany tapty.
"Qazirgi ýaqytta atalǵan jaıt boıynsha qylmystyq kodekstiń 293-bap "Buzaqylyq" jáne 287-bap "Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý" boıynsha sotqa deıingi tergeý amaldary júrgizilip jatyr. Jastar qamaýǵa alyndy. Polısıa qyzmetkerleri kúdiktilerdiń basqa da qylmystarǵa qatystylyǵyn tekserip, qarýdyń qaıdan alynǵanyn anyqtap jatyr" delingen habarlamada.
Pikir qaldyrý