Prezıdent Qasym-Jomart Toqaev Bas prokýratýranyń basshylyq quramymen keńes ótkizdi, dep habarlady Aqorda saıty.

Saıt málimetinshe, Toqaev bas prokýratýranyń, oblystardaǵy jáne respýblıkalyq mańyzy bar qalalardaǵy prokýratýralar basshylarynyń qatysýymen beıne baılanys rejıminde keńes ótkizgen.

Prezıdent baqylaýshy organ túrli áleýmettik qaqtyǵystardyń destrýktıvti áleýetin tómendetý úshin aldyn-alý sharalaryn qabyldaýy kerek, sondaı-aq, ýaqytyly tólenbeıtin jalaqylardy, zańsyz qysqartýlardy jáne eńbek qatynastaryndaǵy basqa da jaǵymsyz áreketterdi der kezinde anyqtap, jolyn kesýi kerek dep sanaıdy. Qasym-Jomart Toqaevtyń aıtýynsha, prokýratýranyń bul baǵyttaǵy jumystarynyń nátıjeleri jaman emes.

– Ótken jyldyń ózinde ǵana sizderdiń nátıjeli jumystaryńyzdyń arqasynda 29 myń qyzmetkerdiń jalaqydan qaryz bolǵan 2,7 mıllıard teńge qarjysy tólendi. Bul jumysty jalǵastyrý kerek. Ásirese, keıbir kásiporyndarda shıelenistiń órshýi baıqalady. Mundaı máselelerde aımaqtaǵy prokýrorlar naqty pozısıa ustanyp, belsendi áreketterge barýy tıis. Ár is boıynsha ońtaıly sheshim shyǵaryp, zań ústemdigine qol jetkizý qajet. Meniń tapsyrmam boıynsha qazir ákimder osy máselemen aınalysyp jatyr. Bul jumysqa prokýratýra da aralasýy tıis, – dedi memleket basshysy.

Prezıdent óz sózinde karantın sharalaryn qamtamasyz etý jáne memleket múddelerin qorǵaý kezinde zańdylyqty saqtaýdyń mańyzdylyǵyna da mán berdi. Memleket basshysy polısıa men sanıtarlyq qyzmet tarapynan olqylyqtar jiberiletin bolsa, ondaı jaǵdaıda prokýratýraǵa birden qajetti sharalar qabyldaýdy tapsyrdy. Odan bólek Qasym-Jomart Toqaev qarjy salasyndaǵy túrli alaıaqtyq áreketterdiń aldyn alý qajettigin atap ótti.

– Qazirgi kezeńde biz ekonomıkadaǵy jaǵymsyz úderisterdi joıýǵa kúsh salyp jatyrmyz. Osyǵan baılanysty keıde Ulttyq qordyń qarjysyn jumsaýǵa týra keledi. Sondyqtan bul qarajattyń zańdy jáne oryndy ıgerilýi aıryqsha mańyzdy. Ásirese, memlekettik áleýmettik baǵdarlamalar men daǵdarysqa qarsy sharalarǵa bólingen qarjyǵa erekshe nazar aýdarý kerek. Sondaı-aq jalaqy, zeınetaqy jáne járdemaqy tóleý máselelerin árdaıym baqylaýda ustaý qajet. Búdjetten bólingen ár teńge maqsatqa saı jumsalyp, qoǵamǵa paıda ákelýge tıis, – dedi prezıdent.