"Kúndelik" júıesin buzý týraly aqparat shyndyqqa janaspaıdy. Bul týraly bilim jáne ǵylym mınıstrliginiń baspasóz qyzmeti habarlady.
– "Kúndelik" elektrondyq júıesi "Ulttyq aqparattyq tehnologıalar" AQ serverlik ortalyǵynyń bazasynda ornalasqan ári syrtqy shabýyldardan qorǵalǵan, – dedi "Kúndelik" JSHS dırektory Muhtar İlıasov.
Onyń aıtýynsha, júıeni ulttyq qaýipsizdik komıtetiniń "Memlekettik tehnıkalyq qyzmet" AQ turaqty baqylap otyrady. Kez kelgen syrtqy shabýyldy QR UQK qadaǵalaıdy.
Sondaı-aq ol "Kúndelik" júıesin buzý týraly aqparat shyndyqqa janaspaıtynyn aıtty. Iaǵnı, eshqandaı shabýyl bolmaǵan, paıdalanýshylardyń derekterin qorǵaý tolyqtaı qamtamasyz etilgen.
– Elektrondyq júıede derektermen jumys isteý kezinde jeke aqparattyq qaýipsizdik erejelerin saqtaý qajet. Logın men qupıasózdi bógde adamdarǵa berýge nemese ashyq túrde qaldyrýǵa bolmaıdy. Mundaı jaǵdaılarda akkaýnttar buǵattalyp, keleńsiz jaǵdaılarǵa ákep soqtyrýy múmkin. Máselen, búgin qaskúnem akkaýntyn ashyq qaldyrǵan paıdalanýshynyń atynan júıege kirip, ádepsiz habarlamalar qaldyrdy. Tehnıkalyq qoldaý qyzmeti bul habarlamalardy óshirip, profıldi buǵattady, – dep jaýap berdi Muhtar İlıasov.
Pikir qaldyrý