Úıdi pesh jaǵyp, kómirmen jylytyp otyrǵan almatylyq turǵyndardyń ýaıymy bir – qyp-qyzyl aqshaǵa tonnalap kómir túsirý. Kómir alýǵa qajet aqshadan bólek, pesh jaǵý kezindegi mashaqatty aıtsańyzshy. Pesh tútindep, qaqaǵan aıazda esik-terezeni ashyp jeldetetin kezder de jıi bolady. Al tútindep janǵan pesh adam ómiri úshin qaýipti ekeni aıtpasa da túsinikti. Osy oraıda Halyk Bank jáne Almaty qalasynyń ákimdigi ázirlegen biregeı áleýmettik baǵdarlamanyń arqasynda 71 otbasy osy mashaqattan qutyldy.

Jobanyń maqsaty birinshi kezekte turǵyn úıdi gazdandyrýǵa muqtaj, alaıda qarjylyq múmkindigi joq halyqtyń áleýmettik osal tobyna jatatyn azamattardy qoldaý bolsa, ekinshi kezekte Almaty qalasy aýa baseıniniń jaǵdaıyn jaqsartý. Osylaısha, Halyk Bank qaıyrymdylyq kómek retinde Almatydaǵy 71 oshaqty gazben qamtysa, endi taǵy 21 úıge tegin gaz qosý jumystary júrip jatyr.

Qazirgi ýaqytta Alataý aýdanynyń turǵyny Jańabaı Qypshaqbaev 1989 jyly kóship kelgeli beri pesh jaǵyp otyrmyz deıdi.  Bul otbasy jylyna 8 tonnaǵa jýyq kómir jaǵady.

– 4 balam bar. Úıde segiz adam turamyz. 2009 jyldan beri múgedek bolyp qaldym. Kózim kórmeıdi. 1 toptaǵy múgedekpin. Halyk Bank-ke alǵysym sheksiz. Barlyq jumysty tegin atqardy. Qys túskende dalaǵa shyǵyp, kómirim jete me, jetpeı me, ne istesek bolady dep oılanyp júr edim. Bul bir tosynsyı boldy, – deıdi úıine kógildir otyr kirgizilgen jandardyń biri.

Almatyda gaz júıesine qosylýǵa muqtaj úılerdiń kóbi qalanyń Alataý jáne Naýryzbaı aýdanynda ornalasqan. Gazdy tegin qostyrtyp, jyly úıde otyrǵan G.Kashıeva hanym da osy Alataý aýdanynyń turǵyny.

– 6 balam bar. Úıde bir adam ǵana jumys isteıtindikten gazdy ornatýǵa jaǵdaıymyz jetpedi. 1997 jyldan beri ot jaǵamyz. Buryn kómirdi de, otyndy da satyp alatynbyz. Kópbalaly analardyń jaǵdaıyn oılap, bizge osylaı kómektesip jatqany úshin Halyq bankine raqmetimdi aıtamyn. Barlyqtaryńyz baqytty bolyńyzdar, – deıdi kópbalaly ana.

Ataýly joba 25 jyldan astam ýaqyt pesh jaǵyp otyrǵan Jumabaevtar otbasyn da qýantty. Otaǵasy jáne onyń bir uly birinshi top múgedegi. Qarjylaı múmkindik bolmaǵan soń tipti úıge gaz tartýdy oılamadyq ta deıdi olar.

– Bizdiń úıge jańa jyl qarsańynda gaz qosty. Jyldyń basyn osyndaı tamasha jańalyqpen bastadyq. Qazir úı jyp-jyly, qolymyz taza. Buryn ot jaǵamyz dep qolymyz kúıe-kúıe bolyp júrýshi edi, – deıdi ótken kúnderdi eske alǵan Janar hanym.