Qyzylordadaǵy Qyzyljarma yqshamaýdanynda kópbalaly otbasy turyp jatqan úı órtenip, jasqa tolmaǵan náresteniń jansyz denesi tabyldy. Balalardyń anasy men 4 bala aýrýhanaǵa jetkizildi, dep jazady sputnik.kz saıty.

Órt 50 sharshy metrlik "vremánkada" balalar uıyqtap jatqanda bolǵan. Jeńil materıaldardan jasalǵan tamdy jalyn áp-sátte sharpyǵan.

Oblystyq órt sóndirý jáne avarıalyq-qutqarý qyzmetiniń mamandary úıde bolǵan 27 jastaǵy áıel men bes balany alyp shyqqanymen, úıdiń kenjesi – jasqa tolmaǵan aılyq sábı tunshyǵyp qalǵan. Áıel denesiniń 3 paıyzyn, 2018 jyly týǵan qyz denesiniń 0,1 paıyzyn kúıik shalǵan. Qalǵan úsh balaǵa ys tıgen. Qazir olar dárigerler baqylaýynda.

KazTag saıty kópbalaly otbasynyń 2018 jyldan beri baspana keziginde 1230-y bolyp turǵanyn, jergilikti bılik olardy ýaqytsha baspanamen qamtamasyz etetinin habarlady.

Osyǵan uqsas jaǵdaı 2019 jyly 4 aqpanda Nur-Sultanda bolǵan. Ol kezde órt saldarynan 2006, 2008, 2013, 2015 jáne 2018 jyly týǵan bes qyz bala qaza tapqan.

Munyń arty kópbalaly áıelderdiń narazylyǵyna ákelip soǵyp, bılik 21 myń teńge kólemindegi ataýly áleýmettik kómek járdemaqysyn taǵaıyndaǵan.