Jambyl oblystyq polısıa departamenti bastyǵynyń birinshi orynbasary Baqyt Rataev órttiń shyǵý sebebin aıtty.

– Órt faktisi boıynsha Qylmystyq kodekstiń 292-baby 3-bóligi boıynsha sotqa deıingi tergeý bastaldy. Sot-saraptama ortalyǵy mamandarynyń aldyn-ala málimeti boıynsha, ólim ýly gazdan ýlanýdan, al órttiń ashyq ot kózi tutanǵysh materıaldyń, ıaǵnı tósek-oryn jabyndarynyń betine tıgeninen bolǵan. Órttiń sebepteri barlyq qajetti saraptama nátıjesi boıynsha jarıalanady, – dedi Baqyt Rataev.

Tótenshe jaǵdaılar departamentiniń bastyǵy Ermek Mombaev órt-tehnıka zerthanasynyń aldyn ala zertteý málimetterin jarıalady.

– Órt bes qabatty turǵyn úıdiń úshinshi qabatyndaǵy úsh bólmeli páterde boldy. Ot balalar bólmesinde tutanǵan. Jalyn 16 sharshy metr aýmaqty qamtydy. Jyljymaly órt-tehnıkalyq zerthanamen zertteý júrgizý kezde oqıǵa ornynda janǵan symdar men elektr jabdyqtary, pesh nemese basqa da qosymsha jylytý quraldary tabylmady, úı ortalyq jylytýǵa qosylǵan, – dep aıtty TJD basshysy.

Arnaıy komısıanyń tóraǵasy, Jambyl oblysy ákiminiń orynbasary Ulan Jazylbek zardap shekken otbasyna barlyq qajetti kómek kórsetiletinin atap ótti.

– Oqıǵanyń mán-jaıyn anyqtaý úshin oblys ákiminiń ókimimen komısıa quryldy, onyń quramyna jergilikti atqarýshy organdardyń, prokýratýranyń, polısıa departamentiniń, TJ departamentiniń jáne basqa da jaýapty memlekettik organdardyń ókilderi kirdi.

Keshe komısıa músheleri qaıǵyly oqıǵa ornyna baryp, jumys júrgizýde. Bizdiń tarapymyzdan barlyq qajetti kómek kórsetiledi, psıhologıalyq kómekti jáne jerleý rásimin uıymdastyrýǵa qol ushyn beremiz, – dep atap ótti Ulan Jazylbek.

Onyń aıtýynsha, balalardyń ákesi jumysta bolǵan, al anasy dekrettik demalysta (mektepte muǵalim).

Sonymen qatar ákim orynbasary órt kezinde basqa da zardap shykken adamdar joǵyn atap ótti. 

Eske sala keteıik, keshe Jambyl oblysy Jańatas qalasy 2 yqshamaýdandaǵy 5 qabatty turǵyn úıdiń 3-shi qabatynda órt bolǵan. Páter ishinde ata-ananyń qaraýynsyz kámelet jasyna tolmaǵan 2015, 2016, 2017, 2019 jáne 2020 jyldary týǵan 5 bala qalǵan. Órt bolǵan ýaqytta úıdiń otaǵasy jumysta bolǵan, al anasy dúkenge shyǵyp ketkeni habarlandy. Tútinge ýlanǵan balalar jedel túrde aýrýhanaǵa jetkizilgenimen, araǵa biraz ýaqyt salyp kóz jumǵan.