Qyrǵyzstan prezıdenti Sadyr Japarov respýblıkadaǵy orys tili mártebesiniń ózgerýine qarsy. Bul týraly ol óziniń "Odaqtastyq baılanys" atty maqalasynda málimdedi, dep habarlady TASS saıty.

– Orys tili – bul resmı til ǵana emes, sonymen birge eldegi ultaralyq qarym-qatynas tili. Ol zańnamalyq deńgeıde jaqsy qorǵalǵan. Orys tiliniń mártebesi konstıtýsıamyzda bekitilgen. Men prezıdent – adam men azamattyń quqyqtary men bostandyqtarynyń kepili retinde orys tili mártebesin saıası manıpýlásıaǵa aınaldyrýǵa qarsymyn, – dedi Japarov.

Qazirgi ýaqytta Qyrǵyzstanda orys tili resmı mártebege ıe.

– Orys tili – qazirgi ádebıet pen mádenıetti túsinýdiń múmkindikterin ashatyn qarym-qatynas quraly. Biz negizgi aqparatty orys tilinde alamyz. Sonymen qatar, memlekettik tildi damytýda da aıtarlyqtaı ilgerileýshilik baıqalady. Jastar, ánshiler, akterler orys tilinde sóıleıdi. Osy tilde zańdar, mańdaıshalar jazylady. Qyrǵyz tili orys tiline zıan keltirmeı damýǵa tıis, –  dep esepteıdi Japarov.

Ol eki el arasynda eshqashan problemalar týyndamaǵanyn eske saldy.

– Aldaǵy sapar elderimiz arasyndaǵy qatynastardy nyǵaıtýǵa jáne ózara qyzyǵýshylyq týdyratyn barlyq salalardaǵy yntymaqtastyqty damytýǵa yqpal etetinine senimdimin, – dedi Sadyr Japarov.

Buǵan deıin ol kelesi aptada Reseıge sapar shegetini týraly málimdegen. Bul onyń memleket basshysy retindegi alǵashqy sheteldik sapary bolmaq.