«Ómir degenimiz - «aqylsyz ertegi ... eshteńeni bildirmeıdi».

 «Júrek kózdegen maqsatty qorqaq kóz áshkere eter»

Makbet

Teatr – tarıh, teatr – ómir, teatr – shyndyq! Taǵylymdy teatr óneri – ǵasyrlar boıy sheksiz de tuńǵıyq adam janynyń san qatparly syrlaryna sarqylmas sahna ómiri arqyly sapar shegip, ár dáýirde tarıh qoınaýynda ózgeshe erek esimderimen saqtalǵan dara tulǵalar beınesin búgingi kún kórermenine  jetkizetin erekshe kúsh.  

Almaty Memlekettik qýyrshaq teatry sońǵy jyldary eresekterge arnalǵan qoıylymdar qataryn salmaǵy basym, baǵyty basqa, formaty ózge

kúrdeli de tyń týyndylarmen tolyqtyryp, dástúrli úrdisten alshaq fılosofıalyq jáne ıdeıalyq mazmuny keń, eksperımentaldy shyǵarmalardy jaryqqa shyǵarýda. Solardyń biri  aǵylshynnyń uly dramatýrgi Ý.Shekspırdiń bizge jetken 12 tragedıasynyń ishindegi belgili shyǵarmasy – «Makbet».

Qazirgi tańda ózindik ózgeshe rejıserlik qoltańbasymen, tereń astarly da shynaıy obrazdarymen, kúrdeli de kórkem sheshimderimen kóptiń kózaıymyna aınalyp,  teatr maıtalmandary men synshylarynyń joǵary baǵasyna ıe bolyp júrgen jas ta talantty rejıser Dına Jumabaı Almaty Memlekettik qýyrshaq teatrynda 2018 jyly Sh.Aıtmatovtyń «Qus joly» povesiniń jelisi boıynsha sum soǵystyń zardabyn kórsetken «Ana-Jer Ana»,  2019 jyly Ý.Shekspırdiń  shyrǵalańǵa toly mahabbat oqıǵasyn arqaý etken «Romeo men Djýletta» tragedıalaryn sahnalaǵan bolatyn. Atalmysh týyndylar halyqaralyq, respýblıkalyq teatr festıvállderinde júldeli oryndarǵa ıe bolyp, qýyrshaq teatrynyń jańa qyryn ashqan úzdik qoıylymdar qatarynda.

Ý.Shekspır shyǵarmashylyǵynan tańdalǵan «Makbet» tragedıasy da adamnyń  ishki arpalys sezimderin, názik te tylsym psıhologıalyq kúshterdi, fılosofıalyq oılar men búgingi kúnde de mańyzyn joǵaltpaǵan máselelerdi   sheber beınelegen qoıylym.

Adam ómiriniń ajyramas bólikteri ómir men ólim, bılik pen baǵa, arbasý men almasý, mahabbat pen ókinish, jeńis pen jeńilis, bolashaq pen baqyt, azap pen raqat, ar men uıat, talpyný men tabysý uǵymdary, ashshy shyndyqtyń, jan men ar azabynyń kórinisi «Makbet» tragedıasynda búkpesiz ashyq usynylmaq.

Ón boıyna tereń maǵyna, astarly aqıqat tundyrǵan, shynaıy bolmysymen bólek sezimge bóleıtin qýyrshaq teatrynda tuńǵysh sahnalanǵan «Makbet» tragedıasy aqpan aıynyń 22-24 kúnderi aralyǵynda saǵat 18:30-da óz kórermenderimen qaýyshýǵa daıyn! Teatrda júzdeskenshe!

 Madına TÓLE