Nur Otan-nyń Respýblıkalyq qoǵamdyq qabyldaý bólmesinde azamattardyń mınıstrlermen jáne memlekettik organdardyń basshylarymen onlaın-kezdesýleri jalǵasýda. Qazaqstandyqtardyń mınıstrlerge qandaı máselelermen keletini týraly partıa Ortalyq apparatynyń baspasóz qyzmeti habarlaıdy.

Ádilet mınıstri Marat Beketaevtyń azamattardy qabyldaýy barysynda alımentti ýaqytyly tóleý týraly másele birneshe ret kóterildi. Kentaý turǵyny Baǵıla Toǵmaǵambetova jeke sot oryndaýshylarynyń bereshekti óndirip alý boıynsha áreketsizdigine shaǵymdandy. Týra osyndaı máselemen mınıstrge Túrkistan oblysynyń turǵyny Aqmaral Jaqypova da júgindi. Qabyldaý qorytyndysy boıynsha mınıstr óńirlik qurylymdarǵa barlyq materıaldardy zerdelep, tıisti sharalar qabyldaýdy tapsyrdy.

Advokat Janna Orazbahova İshki ister mınıstri Erlan Turǵymbaevqa seksýaldyq zorlyq-zombylyqqa qarsy arnaıy ortalyqtar qurýdy usyndy. Onyń aıtýynsha, bul ortalyqtarda zardap shekkenderge kómek «bir tereze» qaǵıdaty boıynsha kórsetilýi múmkin, ıaǵnı, sol jerde polısıa birden shaǵymyn qabyldap, dárigerler tekserý júrgizip, psıhologtar qajetti kómek kórsetedi.

Óz kezeginde Erlan Turǵymbaev jobamen egjeı-tegjeıli tanysýǵa ýáde berdi. Mınıstrdiń azamattardy qabyldaýy 4 saǵattan astam ýaqytqa sozylǵanyn aıta keteıik.

Qarjy mınıstri Erulan Jamaýbaevtyń qabyldaýynda «Temeki tútininen azat Qazaqstan úshin» koalısıasynyń jetekshisi Jámıla Sadyqova Qazaqstandaǵy zıandy ónimderdi retteý máselesin kóterdi.

Almaty qalasynyń turǵyny Gúldarıa Qasteeva Mádenıet jáne sport mınıstri Aqtoty Raıymqulovaǵa Á.Qasteevtiń mýzeı-úıine qalpyna keltirý jumystaryn júrgizý jáne irgeles aýmaqtyń kúrdeli jóndeý men abattandyrýdy qajet etetinin, sondaı-aq qyzmetkerlerdiń jetispeıtinin aıtty. Mınıstr bul máseleni óziniń jeke baqylaýyna aldy.

Bilim jáne ǵylym mınıstri Asqat Aımaǵambetovpen kezdesýde azamattar qashyqtan oqytý jáne pedagogıkalyq mamandyq túlekterin jumysqa ornalastyrý máselelerin kóterdi.

Sondaı-aq Premer-Mınıstrdiń orynbasary Roman Sklár men Ulttyq ekonomıka mınıstri Áset Erǵalıev ta azamattardy qabyldady.

Aıta keteıik, ótken jyly Nur Otan partıasynyń qoǵamdyq qabyldaý bólmesine búkil el boıynsha 393 myńnan astam ótinish kelip tústi Bul – 2019 jylmen salystyrǵanda 2 ese kóp. Bul rette sońǵy 5 jylda partıaǵa 1,2 mln adam júgindi, onyń ishinde 423 myńnan astamy – onlaın formatta. Olardyń 92% oń sheshimin tapty, tegin konsýltatıvtik, quqyqtyq jáne ózge de kómek kórsetildi.

Taldaý kórsetkendeı, halyqty negizinen áleýmettik qamsyzdandyrý – 30%, turǵyn úı-kommýnaldyq sharýashylyq – 16%, turǵyn úımen qamtamasyz etý – 15%, eńbek daýlary – 14%, qurylys – 9%, bilim berý – 9%, medısınalyq qyzmet kórsetý – 7% máseleleri alańdatty.

Mınıstrlerdiń – Nur Otan partıasy músheleriniń qabyldaýyna jazylý úshin tómendegi nómirlerge habarlasý kerek:

1. Call-ortalyq 8 800 080 4441 (Qazaqstan boıynsha qońyraý shalý tegin);
2. Whatsapp 8700 800 4441
3. komek@nurotan.kz