Búgin ulttyq qoǵamdyq senim keńesiniń 5-otyrysy ótti. Keńes barysy aldymen Aqordanyń twitter paraqshasynda qysqasha berilip otyrdy. Endi mine, Aqorda saıty prezıdent sóziniń tolyq nusqasyn jarıalady. Jerdi sheteldikterge jalǵa berý men satý máselesi tóńireginde týǵan daýǵa baılanysty prezıdent naqty birneshe sheshim qabyldaǵany habarlandy.

Toqaev jer máselesiniń erekshe mańyzdy ekenin atap ótip, qazaq jeriniń sheteldikterge satylmaıtyny týraly buǵan deıin de birneshe márte málimdegenin eske saldy.

– Bul máselege qatysty qaýesetterdi toqtatý qajet. Sondyqtan men mynadaı naqty sheshimder qabyldadym.

Birinshiden, sheteldikterge jáne sheteldik zańdy tulǵalarǵa  aýyl sharýashylyǵy jerlerin satýǵa, jalǵa berýge zań júzinde birjola tyıym salýdy tapsyramyn. Bul sheteldikterdiń úlesi bar zańdy tulǵalarǵa da qatysty. Men muny prezıdenttiń zań shyǵarý bastamasy arqyly jedel túrde júzege asyrý qajet dep sheshtim. Prezıdent ákimshiligi dál osy máselege baılanysty tıisti zań jobasyn ázirleýi kerek.

Ekinshiden, bir aıdyń ishinde Jer reformasy jónindegi komısıany quryp, 25 naýryzda jumysqa kirisýdi tapsyramyn. Komısıanyń quramyna agrarlyq sektordyń bedeldi ókilderin jáne jer máselesin jetik biletin sarapshylardy qosý kerek.

Úshinshiden, Úkimetke bıylǵy tamyz aıynyń sońyna deıin jer reformasynyń negizgi máseleleri boıynsha ortaq mámile arqyly túbegeıli baılam jasaýdy tapsyramyn.

Tórtinshiden, komısıa jumysynyń árbir kezeńi jáne onda usynylǵan sharalar týraly halyqty únemi habardar etip otyrý kerek. Basty mindettiń biri – komısıa jumysynyń jáne sheshim qabyldaýdyń meılinshe ashyqtyǵyn kórsetý. Eń bastysy, jer sheteldikterge satylmaıtyny týraly túbegeıli sheshim qabyldandy, – dedi ol.