«Nur Otan» partıasy Tóraǵasynyń birinshi orynbasary Baýyrjan Baıbek Facebook jelisindegi paraqshasynda partıanyń aldaǵy kezeńge arnalǵan josparlarymen bólisti.

Onyń aıtýynsha, 1 naýryzda «Nur Otan» partıasynyń qurylǵanyna 22 jyl tolady. Osynaý aıtýly kúnniń qarsańynda elimiz boıynsha myńnan astam belsendi azamat partıa qataryna qosyldy. Olardyń arasynda azamattyq qoǵam, bilim berý, densaýlyq saqtaý, ónerkásip, mádenıet pen sport salasynyń ókilderi bar. 

«Elbasy, partıa Lıderi Nursultan Nazarbaev aıtqandaı, nurotandyqtardyń basty prınsıpteri – jaýapkershilik, komandalyq rýh jáne partıa ıdealdary men qundylyqtaryna berik bolý. Biz Jarǵy talaptaryna sáıkes partıalyqtardyń sapalyq quramyn jaqsartý boıynsha jumysty jalǵastyramyz. Sondaı-aq partıa jaqtastarynyń ınstıtýty keńeıtiledi», - dedi ol.

Baýyrjan Baıbek atap ótkendeı, aldaǵy elektorataralyq kezeńde Elbasy «Nur Otan»-nyń jumysyn tolyqtaı qaıta qurýdy jáne saılaýaldy ýádelerdiń iske asyrylýyna júıeli baqylaýdy qamtamasyz etýdi tapsyrdy.

«Partıa Lıderiniń fraksıalar jumysyn kúsheıtý jónindegi tapsyrmasyna sáıkes bizdiń depýtattardyń qoǵamdyq reıtıńi engiziledi. Partıalyq tizimderde rezervte turǵan 2 myńdaı azamat, sarapshylar men úkimettik emes uıymdar tartyla otyryp, partıa qoǵamdyq keńesteriniń jumysy júıeli túrde qaıta qurylymdalatyn bolady», - dep málimdedi partıa Tóraǵasynyń birinshi orynbasary. 

Sondaı-aq, ol óz jazbasynda «Elektrondy partıa» jobasyn jandandyrý aıasynda Úkimetpen birlesip ár óńir, qala jáne aýdan boıynsha saılaýaldy baǵdarlamalar sheńberindegi jol kartalaryn iske asyrýǵa monıtorıń júrgizý úshin sıfrlyq platforma ázirlenetinin aıtty.

«Partıa Lıderi aıtqandaı, «Nur Otan»-nyń apparaty pandemıa kezeńinde turǵyndarmen naqty jumys júrgizýge baǵdarlanýy tıis. El kólemindegi 234 qoǵamdyq qabyldaý bólmesi ózara áreket jasaýdyń proaktıvti formatyna kóshýi tıis. Onyń ishinde áleýmettik jeliler de qamtylýy qajet. Osyǵan baılanysty alǵa qoıylǵan jańa mindetter eskerile otyryp, qoǵam qaıratkeri Álıa Sadyrbaeva partıanyń Respýblıkalyq qoǵamdyq qabyldaý bólmesiniń basshysy bolyp taǵaıyndaldy. Onyń zań jáne qoǵamdyq uıymdar salasynda 20 jyldan astam jumys tájirıbesi bar», - dep jazdy Baýyrjan Baıbek. 

Sonymen qatar, sońǵy jylda bizge 393 myńnan astam ótinish kelip túskeni aıtyldy. Bul – 2019 jylmen salystyrǵanda 2 ese kóp. 5 jyl ishinde partıaǵa 1,2 mln. adam júginse, onyń ishinde 423 myńnan astamy – onlaın-formatta. Olardyń 92%-i oń sheshimin tapty, tegin konsýltatıvtik, quqyqtyq jáne ózge de kómek kórsetildi.