Almaty kólik holdıńi jóndeý jumystaryna baılanysty 28 aqpan kúni qalanyń eki aımaǵynda qoǵamdyq kólik qozǵalysyna ózgeris enetinin habarlady. Belgilenip otyrǵan jerlerge 28 aqpanda belsendi Janbolat Mamaı bastaǵan Demokratıalyq partıa bastamashyl toby men "Báse" youtube arnasy, sondaı-aq sheteldegi oppozısıoner Muhtar Áblázov jetekshilik etetin Qazaqstannyń demokratıalyq tańdaýy qozǵalysy mıtıń ótkizetinin málimdegen.

"Jóndeý jumystary úshin jabylady" delingen orynnyń biri Demokratıalyq partıa bastamashyl toby men "Báse" youtube arnasy mıtıń orny dep jarıalaǵan Balýan Sholaq atyndaǵy sport saraıynyń mańy.

Almaty kólik holdıńi taratqan aqparattyq habarlamada Abaı dańǵyly boıynsha shyǵys jáne batys baǵytta ornalasqan "Ortalyq stadıon" aıaldama keshenderinde júrgizilgen jóndeý jumystaryna baılanysty barlyq qoǵamdyq kólik marshrýttary úshin aıaldaýǵa tyıym salynatyny aıtylady.

Osy marshrýt boıynsha júretin barlyq avtobýs baǵyttary Abaı dańǵyly boıymen batys baǵytta "Áýezov atyndaǵy teatr", shyǵys baǵytta "Abaı-Baıtursynov" aıaldamasynda toqtaıdy.

Al Muhtar Áblázov jaqtastary jınalatyn Ortalyq saıabaq mańyndaǵy Gogol kóshesiniń Qaıyrbekov-Buzyrbaev kósheleriniń arasynda "troleıbýs jelilerin jóndeý jumystary júretini" sebepti troleıbýs jáne avtobýs marshrýttarynyń sqemalary ózgeredi.

Habarlamaǵa sáıkes, osy jerde qatynaıtyn qoǵamdyq kólik qozǵalystaryna tómendegideı ózgeris enedi:

№25 troleıbýs – Qaldaıaqov – Jibek Joly – Pýshkın – Gogol – Qaldaıaqov kósheleriniń soltústik baǵytynda jáne ári qaraı baǵyt boıynsha;

№1, 12 troleıbýstary Gogol – Qaldaıaqov – Jibek Joly – Pýshkın kóshesiniń shyǵys baǵytynda jáne odan ári baǵyt boıynsha.

№ 13 avtobýs – Qaldaıaqov k-si – Qazybek bı k-si – Qaıyrbekov k-si – Gogol k-si – odan ári qoldanystaǵy syzba boıynsha.

№16 avtobýs – Qaldaıaqov k-si – Qazybek bı k-si – Qaıyrbekov k-si – Gogol k-si – budan ári qoldanystaǵy syzba boıynsha;

№118 avtobýs – Qaldaıaqov k-si – Maqataev k-si (keri baǵytta Kopernık k-si aıaldamasyndaǵy burylys) – Qaldaıaqov k-si – budan ári qoldanystaǵy syzba boıynsha týra jáne keri baǵytta;

Buǵan deıin Demokratıalyq partıa bastamashyl toby men "Báse" youtube arnasy azamattardy jeksenbi, 28 aqpan kúni 12:00-de Almatydaǵy Balýan Sholaq atyndaǵy sport saraıynyń aldyna mıtıńke shyǵýǵa shaqyrǵan. Talaptary – nesıe amnıstıasyn jarıalaý, jer sheteldikterge jalǵa berilmesin, ár otbasyǵa laıyqty baspana, Eýroparlament qarary oryndalsyn!

Sondaı-aq Qazaqstannyń demokratıalyq tańdaýy qozǵalysynyń ókilderi de osy kúni Almatyda Ortalyq saıabaq mańynda saǵat 13:00-de mıtıńke shyǵatyndaryn málim etken. Olar saıası tutqyndarǵa bostandyq talap etpek.