Elde 2020 jyly 8 241 bala semizdikpen tirkelgen. Bul týraly Qoǵamdyq densaýlyq saqtaý ulttyq ortalyǵynyń ǵylymı jáne kásibı damý bóliminiń bas mamany Shynar Abdrahmanova Qamshy saıtyna bergen suhbatynda aıtty.

– Qazaqstanda 2020 jyly 8 241 bala artyq salmaq boıynsha tirkelgen. Halyqaralyq semizdiktiń deńgeıin anyqtaıtyn saıt málimetine sáıkes, elimiz álem boıynsha 94-orynda tur. Karantınge baılanysty bolsa kerek, 2020 jyldy medısınalyq uıymǵa semizdikpen júginetinderdiń qarasy azaıdy, – degen maman balalar men jasóspirimderdiń arasynda artyq salmaq máselesiniń órshý qaýpi bar ekenin aıtady.

– Qashyqtan oqytý júıesi balalardyń densaýlyǵyna aıtarlyqtaı ózgeris engizdi. Jas aǵzaǵa vırýs qaýipti bolmasa da, balalardyń durys tamaqtanbaýy, qozǵalystyń azdyǵynan  artyq salmaq qosylýy múmkin, – deıdi ol.

Shynar Abdrahmanova balalardyń semizdikke ushyraýynyń basty sebebi – qunary kóp taǵamdar ekenin alǵa tartady.

– Búginde balalar quramynda maıy men qant mólsheri joǵary, dárýmenderi men mıneraldary az kalorıaly taǵamdardy jıi tutynǵandyqtan semizdik dertine alyp keledi. Zıandy taǵamdarǵa qatty gazdalǵan sýsyndar, shyryndar, shala pisirilgen jáne quramynda qant pen maıy kóp, qýyrylǵan taǵamdar, maıly et jáne fast-fýd jatady. Semizdikpen kúresýdiń eń tıimdi tásili atalǵan zıandy taǵamdardan múlde bas tartý.