Jas mamandardy mektep jumysyna yntalandyrý úshin "pedagog-moderator" biliktilik sanatyn berýdiń jeńildetilgen tártibi engizildi. Bul týraly bilim jáne ǵylym mınıstri Asqat Aımaǵambetov májilis depýtattarynyń saýalyna bergen  jaýabynda aıtylǵan.

– Daryndy jastardy pedagogıkalyq mamandyqqa tartý maqsatynda muǵalimniń mártebesin kóterý úshin tıisti jumys jalǵastyrylýda. Pedagogıkalyq baǵyt boıynsha oqýǵa túsýge qoıylatyn talaptar birtindep kúsheıtilýde. Osylaı 2020 jyly oqýǵa túsý baly 60-tan 70 balǵa deıin kóterildi, arnaıy emtıhan mazmuny ózektendirildi.

Pedagogıkalyq joǵary oqý oryndarynda oqıtyn stýdentterdiń stıpendıasy ulǵaıtyldy (26 186-nan 42 000 teńgege deıin). Mektep muǵalimderiniń eńbekaqysy ósti. Mektep oqýshylary arasynda kásiptik baǵdar berý jumysyn júrgizý úshin joǵary oqý oryndary bilim basqarmalarymen, mekteptermen ózara is-qımyl jasaıdy, – dedi Aımaǵambetov.

Onyń aıtýynsha, qazirgi ýaqytta barlyq bilim berý baǵdarlamalary pedagogtiń kásibı standartyna jáne jumys berýshilerdiń talaptaryna sáıkes jańartylǵan. Bul rette pedagogıkalyq praktıkaǵa arnalǵan ádistemelik usynystar jasalynǵan jáne oqytýdyń barlyq kezeńinde praktıkany uıymdastyrýdy kózdeıtin úzdiksiz praktıkalyq oqytý júıesi engizilgen.

"2018 jyldan bastap pedagogti atestattaý rásimderiniń jańa formaty engizildi. Osyǵan baılanysty mınıstrlik normatıvtik quqyqtyq qujattarǵa ózgerister engizý boıynsha jumys júrgizdi. Oǵan sáıkes 2021 jyldan bastap pedagogıkalyq joǵary oqý oryndarynyń túlekteri úshin ulttyq biliktilik testileýinen mindetti ótý normasy engizildi. Atalǵan shara túlekterdiń quzyrettiligin rastaýǵa jáne bilim berý uıymdaryn bilikti jas mamandarmen qamtamasyz etýge múmkindik beredi" delingen mınıstr jaýabynda.

– Tájirıbe almasý aıasynda joǵary oqý oryndary oqytýshylarynyń jappaı ashyq onlaın kýrstaryn ázirlep, bilim berý platformalaryna ornalastyrýǵa múmkindikteri bar. Sonymen qatar, joǵary oqý oryndary mekteptermen birlesip ózara tájirıbemen almasý jáne stýdentterge ınovasıalyq pedagogıkalyq tehnologıalar men ádisterdi tıimdi oqytý maqsatymen konsorsıým qurdy.

Qazirgi ýaqytta joǵary oqý oryndary pedagogıkalyq qaıta daıarlaý baǵdarlamalaryn ázirleý boıynsha jumys júrgizýde. Osy baǵytta mınıstrlik joǵary oqý oryndaryna pedagogıkalyq-psıhologıalyq daıyndyqty kúsheıtý úshin pedagogıkalyq qaıta daıarlaý baǵdarlamalarynyń mazmunyn ózgertip, oqý nátıjelerin túzetýdi usyndy, – dedi mınıstr.

Sonymen qatar, jas mamandardy mektep jumysyna yntalandyrý úshin sheteldik joǵary oqý oryndaryn, "Bolashaq" baǵdarlamasyn, aǵylshyn tilinde pánderdi oqytý quqyǵymen bitirýshiler, sondaı-aq prezıdenttik kadr rezervine kirgen adamdar úshin "pedagog-moderator" biliktilik sanatyn berýdiń jeńildetilgen tártibi engizilgen.

– Osylaısha mınıstrlik pedagogıkalyq bilim berý sapasyn arttyrý jáne mektepterdi joǵary bilikti muǵalimdermen qamtamasyz etý boıynsha júıeli, keshendi jumysty júzege asyryp jatyr, – dedi ol.