Qazaqstan onkologtar qaýymdastyǵynyń múshesi, joǵary sanattaǵy onkolog dáriger, akademık, profesor, medısına ǵylymdarynyń doktory Raıymqul Qaraqulov qaıtys boldy. Bul týraly Qazaq onkologıa jáne radıologıa ǵylymı-zertteý ınstıtýty áleýmettik jelidegi paraqshasynda málimdedi.

"Búgin túnde bizdiń qymbatty profesorymyz, ustazymyz, Qazaq onkologıa jáne radıologıa ǴZI Gematologıa jáne súıek kemigi transplantasıasy ortalyǵynyń onkolog dárigeri – Raıymqul Qaraqululy dúnıeden ozdy.

"QazORǴZI" AQ basqarma tóraǵasy Dılára Qaıdarova bastaǵan ınstıtýt ujymy Raıymqul Qaraqululynyń otbasy men jaqyndaryna kóńil aıtady. Bul Qazaqstannyń medısına jáne onkologıa qoǵamdastyǵy úshin orny tolmas qaza" delingen jelidegi jazbada.

Raıymqul Qaraqulov 1942 jyly 13 tamyzda Ońtústik Qazaqstan oblysy Qazyǵurt aýdany Jańabazar aýylynda týǵan. Medısına ǵylymdarynyń doktory, profesor, KSRO Densaýlyq saqtaý isiniń úzdigi, KSRO ónertapqyshy.

1967 jyly Almaty memlekettik medısına ınstıtýtyn, pedıatr fakúltetin bitirgen.

Qazaq onkologıa jáne radıologıa ǵylymı-zertteý ınstıtýtyndaǵy qyzmetin 1971 jyly qarapaıym laborant bolyp bastaǵan.