Densaýlyq saqtaý mınıstri Alekseı Soı mereke qarsańynda qazaqstandyqtarǵa úndeý joldady.
"Merekelik demalys kúnderi qarsańynda taǵy da esterińizge sala ketkim keledi. Kúz ben kóktemde jiti respıratorlyq vırýstyq ınfeksıa (rınovırýs, adenovırýs, paragrıpp vırýs jáne basqalary) asqynady. Qazir JRVI maýsymy jalǵasýda, sondyqtan syrqattaný qaýipi seıilgen joq.
Qyrkúıek pen qańtar aralyǵynda elimizde taralǵan KVI vırýsyn genomdyq zertteý nátıjesi boıynsha koronavırýstyń ("Brıtanıalyq", "Ońtústik Afrıka", "Brazılıalyq") jańa shtamy anyqtalǵan joq. Alaıda halyqaralyq áýe qatynasy qaıta ashylǵanyn, shetelge shyǵatyn el azamattary (eńbek kóshi-qony, oqytý, emdelý, týrızm), sondaı-aq jaqyn jáne alys shetelderden kelgenderdiń qatary kóbeıgenin eskergen jón.
Iaǵnı, koronavırýs ınfeksıasynyń jańa shtammdaryn tasymaldaý qaýpi de artady degen sóz. Áleýmettik-ekonomıkalyq nysandardaǵy shekteý sharalarynyń jeńildetilýi, halyqtyń belsendiligi (áleýmettik araqashyqtyq, maska taǵý rejımi jáne t.b. saqtalmaıdy) koronavırýs ınfeksıasynyń taralý qaýpin údetýi múmkin.
COVID-19 juqtyrǵan naýqastarda ımýnıtet pasıenttiń jasyna qaraı qalyptasady: ımýnıtet balalarda jaqsy damıdy – kámeletke tolmaǵandar arasynda ımýnıtet shamamen 20% bolady. 18-den asqan adamdarda – 14%, 65 jastan asqandarda – 11%. 40%-ynda ımýnıtet óte álsiz jáne ınfeksıa qaıtalanǵanda kómektese almaıdy.
Imýnıtettiń saqtalý uzaqtyǵyna qatysty ǵylymı dáleldengen derek joq, sondyqtan Covid-19-dan saýyqqan adamdarda aýrýdy qaıta juqtyrý múmkindigi kún saıyn artyp keledi.
Karantınge koronavırýs ınfeksıasyna qarsy vaksınasıa ǵana balama bola alady. Eger halyq jappaı KVI-ge qarsy profılaktıkalyq ekpe saldyrsa, ujymdyq ımýnıtet qalyptasady jáne ınfeksıanyń taralýyn toqtatýǵa múmkindik týady" dep jazdy jelidegi jazbasynda.
Pikir qaldyrý