Pavlodarda ata-anasy qan quıýdan bas tartqan náreste bir kún ǵana ómir súrdi, dep habarlady Pavlodarnews.kz saıty.

Saıt málimetinshe, náreste 2021 jyly 22 qańtarda dúnıege kelgen. Shala týǵan náresteniń salmaǵy – 700 gram. Medısına kórsetkishteri boıynsha oǵan shuǵyl qan quıý qajet bolǵan. Alaıda jas ana dinı senimderine baılanysty qan quıýdan bas tartqan. Pavlodarlyq dárigerler birneshe saǵat boıy ony kóndirýge tyryssa da, nátıje shyqpaǵan.

Áıel qan quıýdan bas tartýy saldarynan balanyń ómirine tikeleı qaýip tónse de, sheshimin ózgertpeıtinin jazyp bergen.

Basylym málimetinshe, jas ana "qan quıý arqyly juqtyrý jáne asqyný qaýpi baryn" alǵa tartyp, prosedýraǵa qarsy ekenin aıtqan. Alaıda ol balama emdeý ádisterine kelisken.

Eger ata-analardy sendirý múmkin bolmasa jáne balanyń ómirine qaýip tónse, onda konsılıým jınalady. Onda prosedýrany týystarynyń erkine qaıshy júrgizýdi sheshýi múmkin. Biraq bul ońaı emes. "Halyq densaýlyǵy jáne densaýlyq saqtaý júıesi týraly" kodekske jáne densaýlyq saqtaý mınıstriniń buıryǵyna sáıkes dárigerler gemoglobındi balama túrde arttyra alady.

– Iá, erıtropoetın bar. Iehova kýágerleri bul týraly biledi. Biraq bul preparat jedel qan joǵaltý kezinde qoldanylmaıdy, – dedi neonatolog dáriger, oblystyń perınataldyq ortalyq bas dárigeriniń orynbasary Jańylaı Qapanova.

Pavlodar aýrýhanasynda jas ana qan quıýǵa kelisim bermegendikten, polısıaǵa qońyraý shalyp, konsılıým ótkizdi. Alaıda qan quıýǵa ýaqyt jetpeı, náreste qaıtys boldy.