Prezıdent Qasym-Jomart Toqaev premer-mınıstr Asqar Mamındi qabyldady. Bul týraly Aqorda saıty habarlady.

Saıt málimetinshe, Mamın Toqaevqa osy jyldyń qańtar-aqpan aılaryndaǵy elimizdiń áleýmettik-ekonomıkalyq damý qorytyndylary jáne eldegi sanıtarlyq-epıdemologıalyq ahýal týraly esep berdi.

"Usynylǵan málimetterge sáıkes sońǵy eki aıda ekonomıkada turaqty oń dınamıka baıqalady. Atap aıtqanda, óńdeý ónerkásibi, qurylys, aýyl sharýashylyǵy salalary qarqyndy damyp keledi. Qyzmet kórsetý birtindep qalpyna kele bastady. Aqparat pen baılanys salasynda oń kórsetkishterge qol jetkizildi. Azyq-túlik óndirisi, jeńil ónerkásip, hımıa ónerkásibi, metalýrgıa, onyń ishinde, túrli tústi metal óndirisi men mashına qurastyrý, farmasevtıka salalarynda turaqty ósim bar" delingen habarlamada.

Prezıdentke OPEK+ monıtorıń komıteti otyrysynyń qorytyndylary týraly aqparat berildi. Atalǵan otyrysta Qazaqstan úshin munaı óndirisin táýligine 20 myń barelge deıin kóbeıtý týraly jeke kelisim jasalǵany aıtyldy. Bul taý-ken sektoryndaǵy órdiris ósimin birtindep arttyrýǵa múmkindik beredi.  

Kezdesýde eldegi sanıtarlyq-epıdemıologıalyq jaǵdaı talqylandy. premer-mınıstrdiń aıtýynsha, jaǵdaı baqylaýda: respýblıka boıynsha vırýstyń artý kórsetkishi 0,9-dy quraıdy, juqpaly aýrýhanalardaǵy tósek oryn 23 paıyzǵa, jan saqtaý bólimshelerindegi oryndar 16 paıyzǵa tolǵan.

Memleket basshysyna ınvestısıalar tartý, turǵyndardy jumyspen qamtý, áleýmettik mańyzy bar taýarlardyń baǵasyn turaqtandyrýdy qamtamasyz etý jáne elimizdiń áleýmettik-ekonomıkalyq damýynyń basqa da ózekti máseleleri boıynsha qabyldanyp jatqan sharalar týraly da baıandaldy.