Qańtar-aqpan aılary aralyǵynda qazaqstandyqtarǵa múgedektik jáne asyraýshydan aıyrylý boıynsha járdemaqy túrinde 64 mlrd teńgeden astam qarajat tólendi. Bul týraly eńbek jáne halyqty áleýmettik qorǵaý mınıstrligi habarlady.

Bıyl 1 naýryzdaǵy málimet boıynsha, múgedektigine baılanysty memlekettik áleýmettik járdemaqy alýshylardyń sany – 520,8 myń adam. Al asyraýshysynan aıyrylǵandardyń sany 167,2 myń adamǵa jetken.

Vedomstvo málimetinshe, 2021 jyly qańtar-aqpan aılary aralyǵynda respýblıkalyq búdjetten múgedektigi boıynsha memlekettik áleýmettik járdemaqy tóleýge 51 mlrd teńge, asyraýshysynan aırylý jaǵdaıyna 13,5 mlrd teńge tólengen.

Sondaı-aq aqpanda respýblıkalyq búdjetten múgedektigi boıynsha memlekettik áleýmettik járdemaqylardy tóleýge 25,6 mlrd teńge, asyraýshysynan aıyrylǵandarǵa 6,8 mlrd teńge bólingen.

"Múgedektik jáne asyraýshydan aıyrylý jaǵdaıy boıynsha memlekettik áleýmettik járdemaqylardyń mólsheri múgedektiktiń toby men sebebine, qaıtys bolǵan (qaza tapqan) asyraýshynyń asyraýynda bolǵan adamdardyń sanyna, sondaı-aq tıisti qarjy jylyna arnalǵan "Respýblıkalyq búdjet týraly" zańda belgilengen eń tómengi kúnkóris deńgeıine baılanysty bolady" delingen mınıstrlik habarlamasynda.

2021 jylǵy 1 naýryzdaǵy jaǵdaı boıynsha múgedektigi boıynsha memlekettik áleýmettik járdemaqynyń ortasha mólsheri 49 211 teńgeni, asyraýshydan aıyrylý jaǵdaıy boıynsha memlekettik áleýmettik járdemaqynyń ortasha mólsheri 40 976 teńgeni quraǵan.