Batys Qazaqstan oblysy Bórli aýdany Aqsaı qalasynyń turǵyny Tımýr Bazarov áleýmettik jelide maska kımegen dárigerlerdiń vıdeosyn jarıalady, dep habarlady Moı gorod saıty. 

Saıt málimetinshe, oqıǵa 16 naýryzda bolǵan. Vıdeoda Bórli aýdandyq aýrýhanasyna kelgen Tımýr Bazarov anasynyń sol medısına mekemesinde ekenin aıtqan. 

– Bul vıdeony ózim túsirdim. Terapevter durystap túsindire almady. Anam ınsýltpen aýyryp tursa da, aýrýhanadan shyǵarǵylary keldi. Sondaı-aq naýqaspen dóreki sóılesti, – deıdi Tımýr Bazarov.

Áleýmettik jeli qoldanýshylary vıdeony qyzý talqylap, posttyń astynda júzdegen pikir qaldyrǵan.

– Osy sebepti biz qyzyl aımaqta turmyz. Óıtkeni dárigerlerge báribir, maska rejımi saqtalmaıdy jáne araqashyqtyq ta saqtamaıdy, – dep jazdy Nına Sýdarýshkına.

–  Medısına mekemelerinde vıdeo túsirýge tyıym salý týraly zańdy negizde buıryq bar. Medısına qyzmetkerlerimen dóreki qarym-qatynas úshin ol da jazalanady, – dedi taǵy bir komentator.

Densaýlyq saqtaý basqarmasy bul oqıǵaǵa qatysty túsinikteme berdi.

–  Eki medısına qyzmetkeriniń betperde taqpaǵandary anyqtaldy. Olarǵa tártiptik jaza qoldanylady. Biraq dárigerlerdi vıdeoǵa túsirýge tyıym salynǵan, – dedi oblystyq densaýlyq saqtaý basqarmasynyń basshysy Arman Qalıbekov.