Premer-mınıstrdiń baspasóz qyzmeti "Qazaqstan" ulttyq arnasynyń burynǵy jýrnalısi Erbol Mándibektiń áleýmettik jelide qyzý talqyǵa túsip jatqan jazbasyna baılanysty pikir bildirdi. Jýrnalıs premer-mınıstr men vıse-premerlerdiń, senat pen májilis spıkerleriniń ushý shyǵyndary úshin respýblıkalyq búdjetten jylyna 15-20 mlrd teńge qarajat jumsalady dep málimdegen bolatyn. Premer-mınıstrdiń baspasóz qyzmeti bul derekter shyndyqqan jasaspaıtynyn habarlady.

"İs júzinde 2021 jylǵa premer-mınıstri men premer-mınıstrdiń orynbasarlary bastaǵan qazaqstandyq delegasıalardyń asa mańyzdy ushý saparlaryn (lıterlik reısterdi) júzege asyrýǵa 578 mln teńge mólsherinde shyǵys qarajaty qarastyrylǵan. Kórsetilgen soma 2021 jyly kólik qyzmetterin qamtamasyz etýge eseptelgen. Bul rette tólem qazaqstandyq delegasıalardyń oryndalǵan naqty óńirlik jáne halyqaralyq ushý jaǵdaılary boıynsha tólenedi. Mysaly, 2020 jyly osy maqsatqa 578 mln teńge qarastyrylsa, is júzinde 275,6 mln teńgege jumsaldy" delingen habarlamada.

Baspasóz qyzmetiniń málimetinshe, premer-mınıstr men premer-mınıstrdiń orynbasarlarynda tek olarǵa bekitilgen jeke ushaqtar joq.

Sondaı-aq baspasóz qyzmeti ushaqta qyzmet kórsetýge qyzyl jáne qara ýyldyryq, araq pen vıskı, ekzotıkalyq jemister kiretinin týraly aqparatty da teristedi.

"Ushý uzaqtyǵy 1 saǵatqa deıin bolǵan jaǵdaıda jolaýshylarǵa alkogólsiz salqyn sýsyndar men snekter, uzaqtyǵy 1-3 saǵat bolǵan kezde ystyq tamaq pen ystyq sýsyndar (shaı, kofe) beriledi. Bortta tamaqtandyrý áreket etip turǵan zańnamaǵa – "Qazaqstan Respýblıkasynyń áýe keńistigin paıdalaný jáne avıasıa qyzmeti týraly" QR Zańyna, jolaýshylardy, bagajdy jáne júkterdi áýe kóligimen tasymaldaý qaǵıdalaryna jáne basqa da normatıvtik quqyqtyq aktilerge sáıkes usynylady" degen baspasóz qyzmeti jýrnalıs jazbasy "faktilerdi burmalaýdyń jáne qoǵamdyq rezonans týdyrý úshin jalǵan aqparat taratýdyń taǵy bir jaǵdaıy" dep málimdedi.

Buǵan deıin memlekettik arnada istegen jýrnalıs premer-mınıstrge jáne onyń tórt orynbasaryna jeke-jeke ushaq qarastyrylǵany, onyń shyǵyny týraly esh jerde aıtylmaıtynyn jazǵan.