Prezıdent Qasym-Jomart Toqaev Almaty qalasyn odan ári damytý máseleleri jóninde keńes ótkizdi.

Prezıdent 2020 jyldyń qorytyndysy boıynsha Almatynyń áleýmettik-ekonomıkalyq damýynda oń qarqyn baryn, biraq ahýal qubylmaly sıpatqa ıe ekenin, "bosańsýǵa bolmaıtynyn" aıtty.

Sonymen qatar memleket basshysy qalany odan ári damytý úshin ósimniń jańa bastaýlary qajet ekenin atap ótti. Mundaı baǵyttardyń biri jańasha túrlengen ekonomıka.

– Bul máselede ınnovatorlar, jastar men bıznes arasyndaǵy tıimdi qarym-qatynas mańyzdy ról atqarady. Muny damyǵan elderdiń tájirıbesinen kórýge bolady. Bul jerde "velosıped oılap tabýdyń"  qajeti joq. Kraýdfandıng, bilim berý habtary, bıznes-kómekshilermen aradaǵy arnaıy ınvestısıalyq kezeńder sıaqty tehnologıalar shetelde ózderin jaqsy qyrynan kórsetti. Jalpy ákimdikterde jańasha túrlengen ekonomıkany damytý jóninde túsinik pen ózindik kózqaras bar. 

Almaty qalasynyń tájirıbesin ózge óńirlerde qoldaný qajet. Bizdiń jerimiz talanttarǵa baı. Jas oryndaýshylar, shyǵarmashylyq ókilderi aımaqtyq qana emes, álemdik deńgeıde de moıyndalyp jatyr, – dedi Qasym-Jomart Toqaev.

Jıynda prezıdent el táýelsizdiginiń 30 jyl ishindegi tabystary Almaty qalasymen tyǵyz baılanysty ekenin atap ótti.

– Táýelsizdigimiz Almatyda jarıalandy. Sondyqtan bul shahardyń tarıhı róli aıryqsha. Qazir Almaty – ekonomıkamyzdyń basty qozǵaýshy kúshi. Sonymen birge munda bıznes salasy jaqsy damyǵan, – dedi prezıdent.