11 qyrkúıek kúni «Qamshy» portalynda Qostanaı jáne Aqtóbe  oblystary ákimderi qyzmetterinen bosatylýy múmkin atty maqala jarıalanǵan bolatyn.    

Onda Qostanaı oblysynyń ákimi qyzmetine úsh birdeı kishi sheneýniktiń kandıdatýrasy qarastyrylýda delingen.

Bul jańalyq qazaqstandyq BAQ-nda jarıalanyp úlgermeı jatyp, 14:00-de Úkimet basshysy Kárim Másimov Qostanaı jurtshylyǵyna jańa ákimdi, dálirek aıtsaq, Aqtóbe oblysynyń burynǵy ákimi Arhımed Muhambetovty tanystyrǵan. Osylaısha 51 jastaǵy Nuraly Sadýaqasovtyń oryntaǵy endigi jerde jańa ákim – 43 jastaǵy Arhımed Muhambetovke tıesili boldy.

Al Qostanaı oblysnyń burynǵy ákimi Nuraly Sadýaqasovtyń qyzmetinen  ne sebepti ketkeni týraly naqty aqparattar jarıalanbaǵanymen, sońǵy ýaqytta qazaqstandyq buqaralyq aqparat quraldaryn shýlatqan «saýnadaǵy qoıylym» sebep bolýy múmkin degen sybys taraǵan. Aqorda men Úkimettegi tosyn aýys-túıis saıası sarapshylardy da tańqaldyryp otyrǵany jasyryn emes. Desek te, Prezıdent myrza Aqtóbe oblysynyń ákimi laýazymyna kimdi taǵaıyndaıdy degen saýal áli jaýabyn tapqan joq.

İnformburo.kz saıtynyń habarlaýynsha,  vıse-premer-mınıstr Berdibek Mashbekuly Saparbaev Aqtóbe oblysynyń jańa ákimi bolyp taǵaıyndaldy.

1990-jyldary Berdibek Mashbekuly Qyzylorda, Ońtústik Qazaqstan oblystarynyń ákimi boldy. Ár jyldary Búdjettik josparlaý jáne ekonomıka vıse-mınıstri, Eńbek jáne áleýmettik qorǵaý mınıstri t.b. laýazymdy qyzmetterde bolǵan. Berdibek Mashbekuly Saparbaev 2009 jyly Shyǵys Qazaqstan oblysynyń ákimi bolyp taǵaıyndalǵan. Al 2014 jyldan bastap QR premer-mınıstriniń orynbasary bolyp qyzmet atqaryp keldi.

Saparbaev Úkimetke nesimen jaqpaı qaldy?

Demogogıaǵa qurylǵan QR Úkimetiniń turralaǵan tirshiligi týraly «Qamshy» portaly az jazbaǵan. Qansha jyldan beri jibi túzý basshyǵa jarymaı kelgen Qazaqstan úkimetine Berdibek Mashbekulynyń kelýi – joǵarǵy bılikte «renesans» dáýiri bastalǵanmen para-par edi. Úkimet jasaǵyna qosylǵanyna bir ǵana jyl bolǵanymen Berdibek Saparbaev halyqtyń kóz aldynda ádettegi tynymsyzdyǵymen qaldy. Bir jyl, árıne, az ýaqyt emes. Conymen, Saparbaev bir jyl ishinde ne tyndyrdy? Ne atqardy? Neni umyt qaldyrdy? «Qamshy» portaly saraptap kórgen bolatyn.

Berdibek Saparbaevtyń Úkimettegi  bir jyldyq qyzmetinen túıgenimiz, uıalmaı sóz eterlik birshama aýqymdy sharýalar atqarylypty. Barlyq salada.

Ekonomıka bolsyn, áleýmettik sala bolsyn, rýhanıat salasy bolsyn… 

Bilim jáne ǵylym mınıstri Aslan Sárinjipovtiń izine sham alyp túskeni týraly osyǵan deıin jazǵan bolatynbyz. Berdibek Mashbekulynyń sesti sózderinen sıtatalar keltire ketetin bolsaq, «Elimizdiń joǵarǵy oqý oryndaryn Bas prokýratýra jappaı teksertemin» dedi, «Sanaly stýdent emes, bolashaq jumyssyzdardy ázirlep jatqan   ýnıversıtetter men kolejderdiń esigine qara qulyp salynady. Al oblystardy aıtpaǵanda, Astanadaǵy maqtaýly eki oqý ornyn aralaǵan    Berdibek Saparbaev ony kórip uıaldym», dedi. 

Reforma qýǵysh Bilim mınıstrin qatal synǵa aldy, Astanada otyryp alyp aımaqtaǵy bylyqty bilmeıtin  Sárinjipovtiń shańyn qaqty.

QR Densaýlyq saqtaý jáne áleýmettik damý mınıstri Tamara Dúısenovaǵa da biraz shúılikken. «Sylbyr jumys isteısizder» dep synady.

Ásirese bylyǵy men shylyǵy kóp QR Mádenıet jáne sport mınıstri Arystanbek Muhamádıulynyń da shańyn qaǵyp alǵan.

Qazaq handyǵynyń 550 jyldyǵyn toılaýda dál osy Berdibek Mashbekulynyń yqpaly joǵary ekenin atap ótpeske bolmaıdy.

Iá, Berdibek Saparbaev bir jyl ishinde ózine de, ózgege de tynym bermedi. Kabınette otyrmady. Bálkim osy úshin de Másimov  Qazaqstan Úkimetin Berdibek Mashbekulynan «qutqarýdy» oılaǵan bolar.

Túıin: Úkimettegi ultjandy basshylardyń biregeıiniń ózin shúregeıler kóp kórdi. Sonda Sarapbaev kimniń jolyn kesip ketti?!

Nurgeldi Ábdiǵanıuly