Ádette bala qushaqtap qaıyr tilep júrgenderdiń qolyndaǵy sábıleri olardy bir sátke de mazalamaıdy. Kúnniń ystyǵynda, qystyń aıazynda da olar qundaqtaýly balamen kóshe aralap kúneltedi. Osydan eki jyl buryn óli balanyń denesimen qaıyr tilep júrgen kelimsekterdiń ustalǵanyn aqparat kózderi halyqqa jetkizgen bolatyn. Endigi jaǵdaı da- jaǵa ustarǵa jararlyq jańalyq bolyp tur. Almaty qalasynyń Medeý aýdanynda qaıyr tilep júrgen áıelderdiń qolynda bala emes, qundaqtaýly qýyrshaq bolǵan eken. Bul týraly «Qamshy» portaly  Almaty qalasynyń İİB baspasóz qyzmetine silteme jasaı otyryp habaralaıdy.  Tekserý barysynda ustalǵan  úsh áıeldiń  bireýiniń ǵana qolynda shynymen bala bolǵan. Al, qalǵan ekeýi qýyrshaqpen halyqty aldap kelgen.

«Áıelder qýyrshaqty orap  alypty. Ózbekstan azamatshalary bul qadamǵa jeńil aqsha tabý maqsatynda barǵan. Olar bizdiń elge Kóshi-qon zańdaryn buzý arqyly kelgen eken.  Tekserý kezinde tipti olardyń qujattary da joq bolyp shyqty.»,-deıdi Medeý aýdandyq İİB basshysy, polısıa polkovnıgi Erlan Oralbaev.

Ońaı jolmen aqsha tabýdy kózdegen tilemsekter aldymen halyqtyń psıhologıasyn zerttep alatyny sózsiz. Jeńil jolmen aqsha tapqysy kelgen qýyrshaq-balaly «analar» bizdiń halyqtyń janashyrlyǵyna ábden senim artsa kerek. Demek, otandastarymyzdyń arasynda bala qushaqtaǵan ana kórse,  júregi eljireı qalatyndar az emes degen sóz. Álde, bıligi men qalaýlylaryna aldana beretin qazaqtyń sol bir ańǵal minezin kelimsekter de paıdalanǵysy kele me? Demek, basqany qoıǵanda, bizdi qaıyrshyǵa deıin aldap júr eken ǵoı. Sadaqa bergen jaqsy ǵoı. Bálkim bógde elde kúneltip júrgen olardyń da jaǵdaıy máz emes bolar. Degenmen, sizdiń meıirimdiligińizdi  aqsha tabýdyń ońaı jolyna aınaldyrýǵa eshkimniń haqysy joq. Teńgemiz qunsyzdanyp, eń kedeı memleketterdiń sanatynan tabylyp otyrǵan shaqta qýyrshaq- qaıyrshylardyń kóz jasyn súrtetindeı jaǵdaıda emespiz.

Aınur Tóleý