Biryńǵaı jınaqtaýshy zeınetaqy qory tólem alýǵa ótinish bermegen zeınetkerlerdi izdestirip jatyr. Bul týraly qordyń baspasóz qyzmeti habarlady.

2018 jyly 11 qazannan bastap zeınetkerlik jasqa tolýǵa baılanysty biryńǵaı ótinish berýge bolatyn "bir tereze" qaǵıdaty boıynsha kompozıttik qyzmet engizilgen. Onyń aıasynda zeınetkerlik jasqa tolǵan alýshy biryńǵaı ótinishpen jáne qujattar toptamasymen memlekettik korporasıa ıaǵnı HQO-ǵa júginedi.

"Alaıda BJZQ aqparattyq júıelerinde qordan tólemder júzege asyrylmaıtyn 200 myńnan asa shot (200 160) bar. Bul rette zeınetkerlik jasqa jetken azamattar búdjetten qarajattaryn alyp jatyr. Olardyń kópshiligi zeınetker qataryna 2018 jyldyń 11 qazanyna deıin qosylǵan.

BJZQ salymshylardyń derekterin sáıkestendirý boıynsha jumystar júrgizip,  2021 jylǵy 1 sáýirden bastap qordan tólemder júzege asyrylatyn tulǵalardyń tizimin jasaqtady. Endi osy sanatta bar adamdardyń telefon nómirlerine (ol mobıldi azamattar bazasynda tirkelýi tıis) BJZQ-dan zeınetaqy tólemderin taǵaıyndaý boıynsha belsendi qyzmet kórsetý usynylǵan sms-habarlama joldanady" delingen habarlamada.

Kelisim alynǵannan keıin bul azamattarǵa BJZQ-dan tólemder memlekettik korporasıaǵa alýshylardyń jasyna baılanysty zeınetaqy tólemderi men memlekettik bazalyq zeınetaqy tólemderin taǵaıyndaý kezinde usynǵan bank shottaryna jiberiletin bolady.

Zeınetaqy tólemderin júzege asyrý qaǵıdalarynyń erejelerine sáıkes BJZQ-dan mindetti zeınetaqy jarnalary men mindetti kásiptik zeınetaqy jarnalary esebinen zeınetaqy tólemderi aı saıyn belgilengen keste boıynsha júzege asyrylady.