Bilim jáne ǵylym vıse-mınıstri Sholpan Karınova bıyl birinshi synypqa qabyldaý elektrondyq formatta júrgiziletinin málimdedi. Bul týraly ol Ortalyq komýnıkasıalar qyzmetinde ótken brıfıńte aıtty.

– Ata-analardyń ótinishi boıynsha 1-synypqa alty jasar jáne bıyl 6-ǵa tolatyn balalar qabyldanady. 2021-2022 oqý jyly 1-synypqa 340 myńnan asa bala qabyldaý josparlanyp otyr. Birinshi synyp oqýshylarynyń qujattaryn qabyldaý 1 sáýirde bastalyp, 1 tamyzǵa deıin jalǵasady. Qujattardy egov.kz arqyly berýge bolady, – dedi vıse-mınıstr.

Qujattardy tapsyrý kezinde balanyń týý týraly kýáliginiń kóshirmesi, bala densaýlyǵy pasporty, 3h4 kólemindegi 2 foto bolýy kerek.

Sondaı-aq ol mektep túlekteriniń qorytyndy attestasıasy qalaı ótetinin túsindirdi.

9-synyp oqýshylary 3 emtıhan tapsyratyn bolady:

• oqytý tili boıynsha esse nysanynda jazbasha emtıhan;
• matematıkadan (algebradan) jazbasha emtıhan;
• ózge tilderde oqıtyn synyptarda qazaq tili men ádebıeti boıynsha jazbasha emtıhan jáne qazaq tilinde oqytatyn synyptardaǵy orys tili men ádebıeti boıynsha jazbasha emtıhan.

11-synyp oqýshylary 4 emtıhan tapsyrady:

• oqytý tili boıynsha esse nysanynda jazbasha emtıhan;
• algebra jáne analız bastamalary páninen jazbasha emtıhan;
• Qazaqstan tarıhynan testileý;
• ózge tilderde oqytatyn mektepterde qazaq tilinen jáne qazaq tilinde oqytatyn mektepterde orys tilinen testileý.