Qazaqstan "BUU-nyń gýmanıtarlyq kómek kórsetý jónindegi jahandyq josparyn" júzege asyrýǵa eleýli úles qosty. Bul týraly prezıdent Qasym-Jomart Toqaev "Halyqaralyq qaryz arhıtektýrasy jáne ótimdilik" atty joǵary deńgeıdegi jıynda habarlady.

Memleket basshysy halyqaralyq qoǵamdastyqty teńizge shyǵatyn joly joq damýshy memleketter tobyna múshe elderdiń densaýlyq saqtaý júıesin damytýdy qoldaýǵa, sondaı-aq qajetti vaksınany ýaqytyly jáne tıimdi baǵada satyp alýyna kómek kórsetýge shaqyrdy. Prezıdent topqa múshe elderdiń ornyqty ınfraqurylymyn yntaldandyrý jáne saýda-sattyq rásimderin jeńildetý, sıfrlyq transformasıaǵa qol jetkizýine qoldaý kórsetý qajettigi týraly atap ótip, jeke sektordyń qaıta qalpyna keltirý jumystaryna belsendi qatysý kerektigin aıtty.

Toqaev memlekettik deńgeıde qabyldanyp jatqan sharalarǵa toqtalyp, Qazaqstan "BUU-nyń gýmanıtarlyq kómek kórsetý jónindegi jahandyq josparyn" júzege asyrýǵa eleýli úles qosqanyn jáne koronavırýsqa qarsy kúres kezinde birqatar shet memleketterge járdem bergenin eske saldy.

Qasym-Jomart Toqaev sóz sońynda vaksına salýǵa jáne ekonomıkany qaıta qalpyna keltirýge birshama ýaqyt ketip, soǵan sáıkes uzaqmerzimdi perspektıvada onyń saldary ondaǵan jyldar boıyna saqtalýy yqtımal ekeni jaıyndaǵy boljamyn ortaǵa saldy. Onyń pikirinshe, azamattardyń osal toptaryn, elder men ekonomıkany qorǵaý úshin qazirgi qabyldanyp jatqan sharalardyń barlyǵy ortaq múddeni kózdeıdi. Memleket basshysy munyń daǵdarystan shyǵatyn birden-bir jol ekenine senimdi jáne ony halyqaralyq qoǵamdastyqtyń ortaq mindeti dep sanaıdy.