Aqordada ótken túrkitildes memleketter basshylary keńesiniń V-otyrysynda Qyrǵyzstan Respýblıkasynyń prezıdenti Almazbek Atambaev Qazaqstan prezıdenti Nursultan Nazarbaevty Ystyqkóldiń jaǵasynda demalyp qaıtýǵa shaqyrdy. Bul týraly «Qamshy» portaly tengrinews.kz-ke silteme jasaı otyryp habarlaıdy.

Jaqynda Aqordada túrkitildes memleketter basshylary keńesiniń V-otyrysy ótken bolatyn. Oǵan Qazaqstan prezıdenti Nursultan Ábishuly, Qyrǵyzstan prezıdenti Almazbek Atambaev jáne Ázirbaıjan respýblıkasy prezıdenti Ilham Álıev, Túrkıa jáne Túrkimenstan ókilderi qatysqan.

Bul joly da, ádettegideı Qyrǵyzstan prezıdenti Almazbek Atambaevtyń baıandamasy ózge áriptesterinen góri áserli ári ázildi shyqqany da jasyryn emes.

Qyrǵyz basshysy kelesi samıttiń ótkiziletin ýaqytyn sóz ete otyryp, Qazaqstan Prezıdentinen Sholpan atada ótetin keńestiń naqty merzimin belgileýdi ótindi. Sondaı-aq, Qazaqstan Prezıdenti men Ázirbaıjan Prezıdentin Ystyqkól jaǵasynda demalyp qaıtýǵa shaqyrdy. Qyrǵyz Prezıdentiniń «Meniń josparlaýym boıynsha, tamyzdyń aıaǵynda ótkizsek jaqsy bolar edi. Ystyqkól jaǵasynda demalyp qaıtýǵa, sýǵa da shomylyp alýǵa bolatyn edi», degen sózi bıylǵy samıtte aıtylǵan «hıt» sózderdiń biri boldy. Esh qymsynbastan ázilin ári qaraı jalǵaǵan Almazbek Atambaev myrza, Nursultan Nazarbaevqa kól jaǵasynan arnaıy rezıdensıa tiktiretinin de aıtqan.

Almazbek Atambaev, Qyrǵyzstan prezıdenti: Nursultan Ábishuly, biz kelesi keńesti Sholpan-ata qalasynda ótkizsek dep usynys jasap otyrmyz. Ózińiz bir kúndi tańdasańyz, 15-tamyzdan 25-qyrkúıekke deıingi bir kúndi qazir aıtsańyz. Biz sol kúni ótkizemiz. Siz aqsaqalsyz ǵoı.(qyrǵyz tilinde jadyrańqy sóıledi.)

Nursultan Nazarbaev, Qazaqstan prezıdenti: Onda keńestiń ótetin ornyn keliseıik.(orys tilinde sóılep, ózge de keńes múshelerine qarady)

Almazbek Atambaev, Qyrǵyzstan prezıdenti: Iá, naqty ýaqytyn belgileıik. Nursultan Ábishuly belgilese, durys bolady. Ol kisi ol jerlerdi jaqsy biledi.(bul joly orys tilinde sóıledi)

Nursultan Nazarbaev, Qazaqstan prezıdenti: Áýejaılardy daıyndap qoıady...

Almazbek Atambaev, Qyrǵyzstan prezıdenti: Onyń úsitine sýǵa shomylyp, demalyp qaıtar edińizder. Dál mezgili bolady. (Bári kúldi)

Ilham Álıev, Ázirbaıjan prezıdenti: Men qarsy emespin. Tipti jaqsy emes pe?

Nursultan Nazarbaev, Qazaqstan prezıdenti: Biz bul máseleni sheshemiz. Syrtqy ister mınıstrleri kelissin. Taqyryp solaı qalatyn boldy ǵoı, «sport»?..

Almazbek Atambaev, Qyrǵyzstan prezıdenti: Biz ulttyq sport túrlerinen sharalar uıymdastyryp, qyzyqty etip ótkizetin bolamyz.

Ilham Álıev, Ázirbaıjan prezıdenti: Ózimiz de sol jarystarǵa qatysamyz, ıá?! Onyń ústine jaqsy demalyp qaıtamyz ǵoı.

(Prezıdent myrzalardyń áńgimesi yqshamdalyp alyndy)

Túıin1: Bul jolǵy keńestiń sońyndaǵy áńgimelerden ne túıdik? Almazbek Atambaev óz eliniń ósip-órkendeýi úshin neden bolsa da taıynbaıtynyn taǵy bir márte kórsetti. Ol osyndaı keleli jıynda óziniń basyn ıdi, odan arlanbady. Ózin quddy Nursultan Ábishulynyń bir «mınıstri» sekildi kórsetti. Atambaev Nazarbaevtyń aldynda qansha ıilse de, óz paıdasynan jeńilgen emes. Kerisinshe aldap-sýlap, arqadan qaǵyp júrip qyrýar qarjy, ınvestısıa tartýdyń has sheberine aınaldy.

Al bul jıyndaǵy Qazaqstan prezıdentiniń orny áýelden belgili. Ol búkil túrki jurtynyń aqsaqaly. Báriniń aqylshysy. Qazaqstandy Orta Azıadaǵy qýatty memleketterdiń qataryna qosqan basshy. Oǵan eshkim shek keltire almaıdy. Alaıda, Qyrǵyzstan Prezıdentiniń aǵa dep ıilip, óziniń qyrǵyz tilinde sóılep, emeýrin tanytqanyna qaramastan Reseıdiń memlekettik tilinde jaýap qatty. Iá, ol kisi qyrǵyzsha sóılesin dep turǵanymyz joq. Tek tili men dini, mádenıeti ortaq qyrǵyz baýyryna qazaqtyń qońyr tilimen jaýap qatpaǵany áttegen-aı, degizgeni jasyryn emes.

Bul ekeýiniń oryssha shúıirkeleskenin syrttaı baqylap otyrǵan Ázirbaıjan Prezıdenti mıyǵynan kúlip, bas ızegennen basqa esh nárse kórsetpedi.

Túıin2: Bul Qazaqstan men Qyrǵyzstan jáne ózge de post-keńestik memleketter basshylarynyń quldyq qamyttan arylmaǵanynyń kórinisi emes pe?

Nurgeldi Ábdiǵanıuly

http://tengrinews.kz/tv/novosti/politika/4958/