BQO-da órt sóndirý bóliminiń basshysy qaıtys boldy, dep habarlady "Ýralskaıa nedelá" basylymy.

Saıt málimetinshe, Aqjaıyq aýdany Qaraýyltóbe aýylynda ornalasqan №27 órt sóndirý bóliminiń basshysy Aqan Nurǵalıev aıaýsyz soqqyǵa jyǵylyp, kóz jumǵan.

Oqıǵa 25 naýryzda bolǵan. Marqumnyń baýyry Rýslan Nurǵalıevtiń aıtýynsha, Aqandy saǵat 23:00 shamasynda áriptesteri jumysqa shaqyrǵan.

– Aǵamdy jumysqa ne úshin shaqyrǵanyn bilmeımin. Órt sóndirý bóliminde eki órt sóndirýshiden basqa taǵy eki bóten adam bolǵan. Barlyǵy mas edi. Men qandaı janjal bolǵanyn, kim kimdi urǵanyn bilmeımin. Biraq meniń aǵamdy aıaýsyz soqqyǵa jyqqan. Órt sóndirý bóliminde aıǵaqtardy jasyrý úshin kameralardy syndyrǵan.

Kelesi kúni aǵamnyń denesi aýyldyń shetinde turatyn basqa aǵamnyń saraıynan tabyldy. Jeńgem tańerteń bireýdiń saraıda jatqanyn kórip, meniń aǵam ekenin tanyǵan. Bul týraly bizge dereý habarlap, jedel járdem shaqyrdy. Aǵamdy birden aýdandyq aýrýhananyń jansaqtaý bólimine jatqyzdy. Alaıda ol 27 naýryzda tańǵy saǵat 5:00-de qaıtys boldy. Artynda úsh balasy jetim qaldy, – deıdi Rýslan Nurǵalıev.

Ol aǵasynyń ólimine kináliler jazasyz qalýy múmkin dep alańdaıdy.

BQO polısıa departamentiniń baspasóz qyzmeti bul is boıynsha qylmystyq kodekstiń 106-babynyń 1-tarmaǵy (Densaýlyqqa qasaqana aýyr zıan keltirý) boıynsha sotqa deıingi tergeý júrgizilgenin habarlady.

"2021 jyldyń 25 naýryzynda saǵat 23:00 shamasynda Qaraýyltóbe aýylynyń turǵyndary 1992 jyly týǵan N. men M.arasynda janjal shyǵyp, tóbeles bolady. 26 naýryzda saǵat 08:30 shamasynda N. aǵasynyń úıiniń jazǵy saraıynan es-tússiz kúıde tabyldy jáne jedel járdem kóligimen Aqjaıyq aýdandyq aýrýhanasyna jetkizildi. 27 naýryzda saǵat 05:46-da aýrýhananyń hırýrgıa bóliminen onyń jaraqattan qaıtys bolǵany týraly habarlama kelip tústi. Jábirlenýshiniń qaıtys bolýyna baılanysty is qylmystyq kodekstiń 106-baby 3-bóligi boıynsha qaıta qaraldy. Kúdikti M. qamaýǵa alynyp, ýaqytsha ustaý ızolátoryna qamaldy" delingen polısıa departamentiniń habarlamasynda.