Bilim jáne ǵylym mınıstri Asqat Aımaǵambetov koronavırýsqa qarsy vaksına saldyrý muǵalimderge erikti túrde júrgiziletinin aıtty. Bul týraly ol ortalyq komýnıkasıalar alańynda ótken brıfıńte málimdedi.

– Densaýlyq saqtaý mınıstrliginiń málimetine súıensek, búginde vaksına saldyrǵandardyń 17 paıyzy muǵalimder. Vaksınany saldyrý muǵalimniń óz erkinde. Eshkim májbúrlemeıdi. Biraq mınıstr retinde bizdiń áriptesterimizdi óz erkimen osy vaksınany saldyrýǵa, ǵylymǵa senýge shaqyramyn. Birinshiden bul elimizdiń qaýipsizdigi, ekinshiden mektepte oqyp jatqan balalardyń qaýipsizdigi jáne ujymdarymyz ben otbasylarymyzdyń qaýipsizdigi. Sondyqtan ekspertterge senip, vaksınany der kezinde saldyryp, tıisti jaǵdaı jasaıdy dep úmittenemin, – dedi mınıstr.

Aımaǵambetov brıfıńte kitaphanashylardyń jalaqysyna qatysty da suraqqa jaýap berdi.

– Kitaphanashylardyń jalaqysy máselesin aldyńǵy jyly kótergenbiz. Qazir biz bul máseleni sheshý úshin túbegeıli ózgerister engizip jatyrmyz. Jaqynda bul másele sheshiledi dep úmittenemiz. Osy másele boıynsha tıisti qarjylandyrý kózderin tabýǵa jumys júrgizilýde, – dep aıtty ol.