«Nur Otan» partıasynda qazaqstandyqtardyń qandaı túıindi máselelerin sheshýge qol ushyn sozyp jatqany týraly aıtyldy. Jyl basynan beri el boıynsha qoǵamdyq qabyldaý bólmelerine 43 myńnan astam ótinish túsken. Olardyń ishinde erekshe qajettilikteri bar azamattar úshin qoljetimdi orta jasaý, kópbalaly jáne az qamtylǵan otbasylarǵa áleýmettik kómek kórsetý, eńbek quqyqtarynyń buzylýy jáne taǵy da basqa máseleler bar.

Baspasóz qyzmetiniń málimeti boıynsha, «Nur Otan» partıasy kishigirim ótinishterdiń ózinen bas tartpaı, keıde tipti, turǵyndardyń múldem erekshe suranystaryn sheshýge kómektesedi.

Máselen, Shyǵys Qazaqstan oblysy Borodýlıha aýdanynyń turǵyny «Nur Otan» partıasyna otbasyn ajyrasýdan saqtap qalýdy surap, ótinish bildirgen. Óz kezeginde partıanyń qoǵamdyq qabyldaýynda zańgerler men medıatordyń tegin qyzmetteri usynyldy. Nátıjesinde erli-zaıyptylar tatýlasty.

Atyraý oblysynda nurotandyqtar er adamǵa jumys tabýǵa kómektesti. Jubaıynan aıyrylyp, eki balasymen jalǵyz qalǵan ol pandemıaǵa baılanysty jumystan da shyǵyp qalǵan. Turǵyn «Nur Otan» partıasynyń Jylyoı aýdandyq fılıalyna kelip, bos jumys oryndaryn izdeýge kómek kórsetýdi surady. Nátıjesinde partıalyqtar oǵan avtobýs júrgizýshisi bolyp jumysqa turýǵa kómektesti.

Almaty oblysynda Qarasaı aýdany Áıteı aýylynda turatyn zeınetker Maral Ómisheva 5 jyl boıy jergilikti bılik organdarynan úıiniń janyndaǵy joǵary kerneýli elektr kolonkasyn ýchaskeden tys jerge shyǵarýǵa kómek surap kelgen. Zeınetker osy másele boıynsha «Nur Otan»-nan kómek surap kelip, partıanyń aralasýynan keıin ǵana másele oń sheshimin tapty.

Tarazda partıa ókilderi I toptaǵy múgedek Raýan Raýylbekovke áleýmettik járdemaqy boıynsha 3 aılyq qaryzyn alýǵa kómektesti. Bul jaǵdaı onyń qajetti qujattardy ýaqytynda tapsyrǵanyna qaramastan oryn alǵan.

– Partıaǵa kelmes buryn máselemdi alǵa tartyp, ártúrli deńgeıdegi 5 mekemeniń ókilderine birneshe ret bardym. Biraq odan eshqandaı nátıje bolmady. Sosyn áleýmettik jeliden «Nur Otan» partıasynyń qoǵamdyq qabyldaý bólmesi bar ekeni jáne onda azamattardy túrli deńgeıdegi basshylardyń qabyldaıtyny týraly habarlandyrýdy kezdeısoq kózim shalyp qaldy. Osylaısha, 3 aıdan astam ýaqytqa sozylǵan máselemdi 3 kúnde sheship berdi, – dedi Raýan Raýylbekov.

Sonymen qatar, «Nur Otan» belsendileri qys boıy zeınetkerlerge, ardagerlerge jáne erekshe qajettilikteri bar adamdarǵa aýlalardy qardan tazalaýǵa, al kóktem shyqqaly jeke úı-jaılarynyń mańyn erigen qar sýynan arshýǵa kómektesti.

Ótken jyly «Nur Otan» qoǵamdyq qabyldaýyna 393 myńnan astam ótinish tústi. Bul rette 5 jyl ishinde partıaǵa 1,2 mln adam júginse, onyń 423 myńnan astamy – onlaın-formatta. Olardyń 92% oń sheshimin tapty, tegin konsýltatıvtik, quqyqtyq jáne ózge de kómek kórsetildi.

«Halyqqa kómek» jobasy aıasynda zańgerlermen, advokattarmen, medıatorlarmen jáne notarıýstarmen tegin konsýltatıvtik onlaın-kezdesýler uıymdastyryldy. Sondaı-aq, otbasy, áıelder jáne balalardyń quqyqtaryn qorǵaý jáne turmystyq zorlyq-zombylyqqa qarsy is-qımyl máseleleri boıynsha «111 shuǵyl qyzmeti» arnaıy baılanys ortalyǵy iske qosyldy.