Bilim jáne ǵylym mınıstrligi magıstratýra men doktorantýraǵa túsý erejelerine ózgertýler engizilgenin habarlady.

Mınıstrliktiń málimetinshe, bıyldan bastap doktorantýraǵa qabyldaý emtıhany elektrondyq formatta júrgiziledi. Úmitkerler kompúterde otyryp esse jazady, doktorantýrada oqýǵa daıyndyǵyn rastaý úshin test tapsyrady jáne bilim berý baǵdarlamasy tobynyń beıini boıynsha emtıhan tapsyrady.

– Bıyl doktorantýraǵa túsý erejelerine birqatar ózgeris engizildi. Doktorantýraǵa qabyldaý emtıhany alǵash ret testileý ortalyqtarynyń bazasynda derbes kompúter arqyly elektrondyq formatta ótedi. Ótken jyly bul tásil magıstratýraǵa qabyldaý kezinde qoldanylǵan bolatyn. Bul – qabyldaý emtıhandary tek testileý formatynda ótedi degen sóz emes. Bolashaq doktoranttar JOO-lar bekitken taqyryptar boıynsha esse jazady. Qabyldaý emtıhanynyń qorytyndy baǵasy esse, doktorantýrada oqýǵa daıyndyq testi jáne beıindi emtıhan baǵalarynyń jıyntyǵynan turady, – dedi BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev. 

Sondaı-aq doktorantýraǵa ótinish qabyldaý 3 shildede bastalyp, 3 tamyzǵa deıin jalǵasady. Doktorantýranyń bilim berý baǵdarlamalaryna túsý emtıhandary 4-20 tamyz aralyǵynda ótedi. Doktorantýraǵa qabyldaý 28 tamyzda aıaqtalady.

Al magıstratýraǵa túsýge arnalǵan keshendi testileýge qatysý úshin ótinishter qabyldaý 1 maýsymda bastalady.

"Magıstratýraǵa keshendi testileýge ótinish BǴM Ulttyq testileý ortalyǵynyń saıty arqyly 1 maýsym men 15 shilde aralyǵynda qabyldanady. Keshendi testileýdiń qorytyndysy boıynsha kýálik elektrondyq túrde testilenýshiniń jeke kabıneti arqyly beriledi. 

Magıstratýraǵa keshendi testileý 20 shildede bastalyp, 10 tamyzǵa deıin jalǵasady. Magıstratýraǵa qabyldaý 28 tamyzda aıaqtalady" delingen mınıstrlik taratqan habarlamada.

Magıstratýra men doktorantýraǵa túsý úshin qajet halyqaralyq sertıfıkattar tizimi:

• Magıstratýranyń bilim berý baǵdarlamalary boıynsha oqýǵa túsý úshin halyqaralyq sertıfıkattardy usynýǵa nemese keshendi testileý (KT) barysynda shet tilinen test tapsyrady;
• Doktorantýranyń bilim berý baǵdarlamalary boıynsha oqýǵa túsý úshin shet tilin meńgergendigin rastaıtyn sertıfıkat mindetti.