«Nur Otan» partıasynda májilistiń jáne barlyq deńgeıdegi máslıhattardyń 600 jas depýtatynan turatyn Korpýs quryldy. Nurotandyq jas depýtattar jastardy qoldaý jáne zań shyǵarý prosesinde olardyń múddelerin qorǵaý úshin kúsh-jigerlerin biriktirýge nıetti.

Baspasóz qyzmeti taratqan aqparatqa sáıkes, Elbasy, partıa lıderi Nursultan Nazarbaevtyń tapsyrmasy boıynsha belgilengen kvotanyń arqasynda barlyq deńgeıdegi máslıhattarda «Nur Otan» partıasynyń jas depýtattarynyń sany 3 esege – 7-den 23%-ǵa deıin artqan. 2025 jylǵa deıingi «Jastar – Otanǵa!» baǵdarlamasy qabyldanyp, onda áleýmettik lıft qurý, jastardyń bastamalaryn iske asyrý, jumysqa ornalastyrý, bilim berý sapasyn arttyrý sıaqty jáne t. b. 100-den astam naqty sharalar qamtylmaq.

– Korpýs jumysy aıasynda turǵyndarmen tyǵyz qarym-qatynas ornatyp, ártúrli sanattaǵy jastarmen baılanys ornatý mańyzdy. Onyń ishinde áleýmettik jeli arqyly jumys isteýge, barynsha ashyq ári halyqqa jaqyn bolýǵa den qoıý qajet. Sizderdiń árqaısyńyz – partıanyń senim mandatyna ıe bolǵan jas saıasatkersizder. Partıanyń halyqqa jaqyn bolý, turǵyndarmen «keri baılanys» ornatý, qoǵamdaǵy ár túrli toptardyń únine qulaq asyp, elmen tyǵyz, qoıan-qoltyq jumys isteý qaǵıdalaryn basshylyqqa alý kerek. Atalǵan tapsyrmalardy sapaly jáne nátıjeli iske asyrý úshin Jas depýtattar korpýsyna partıa tarapynan barynsha qoldaý kórsetiletin bolady, – dedi jastarmen ótken onlaın kezdesý barysynda partıa hatshysy Álibek Áldeneı.

Partıanyń baspasóz qyzmetinde atap ótkendeı, májilis pen barlyq deńgeıdegi máslıhattardyń 616 jas depýtatynyń 427-si nemese 69%-y partıa lıderi Nursultan Nazarbaevtyń bastamasymen júzege asqan partıaishilik praımerızden ótkender.

Daýys berý qorytyndysy boıynsha Jas depýtattar korpýsynyń basshysy bolyp parlament májilisindegi «Nur Otan» partıasy fraksıasynyń depýtaty Elnur Beısenbaev saılandy.