Sáýle Súleımenova – almatylyq sýretshi. Ol týyndylaryn salýda maıly boıaýdyń ornyna polıetılen paket qoldanady. Qoqysta jatqan qaptamalardan kartına salatyn sheber týyndylarymen Qamshy portalynyń tilshisi tanysyp qaıtty.

Sýretshi 2014 jyldan bastap maıly boıaýmen qylqalamnyń ornyna  paket pen jelim qoldanady. Ol áýeli sýretti qaǵaz betine qaryndashpen salady. Sosyn kerekti tústerdi qyrqyp alyp, ystyq jelimmen jabystyryp shyǵady. Onyń aıtýynsha, polıetılen paketteri naǵyz óner týyndysy.

Sáýle Súleımenov:

Dúkenge baryp, azyq-túlik alyp keldim. Bosaǵan paketti, shkafta turǵan paketterge qosyp qoıdym. Qarasam olar túrli-tústi, ádemi bolyp jatyr. Sodan oıladym: maıly boıaýdy satyp alýdyń ne qajeti bar?! Nege osy pakettermen sýret salmasqa?!

Tilshi:

Qylqalam ornyna paketti serik etken sýretshi qazaq halqynyń tarıhyn da qaǵaz betine túsirip keledi. "Qaldyq estelik" dep atalatyn óner jobasynda asharshylyq, jeltoqsan syndy qıyn-qystaý kezeń sýretteledi.

Sáýle Súleımenova:

Ata-analarymyz bizge aıtpaıdy. Óıtkeni olarǵa qıyn kezeńdi eske alý aýyr. Alaıda ol – tarıh. Paketti qoqysqa tastasaq ta joıylmaıdy ǵoı. Sol sekildi tarıh ta árdaıym bizben birge júredi. Sondyqtan biz olardy da eske túsirip turýymyz qajet. 

Tilshi:

Elimizde qoqystyń 10 paıyzy ǵana óńdeledi. Onyń ishinde plasık qaptamalar óńdelmeıtin zattar sanatyna jatady. Qylqalam sheberi polıetılen paketter qorshaǵan ortany lastaǵansha, osylaı bolsa da kádege jarasa eken deıdi.