Búgin májilis spıkeri Nurlan Nyǵmatýlınniń tóraǵalyǵymen palata búrosy ótip, onda aldaǵy jalpy otyrystyń kún tártibi naqtylandy.

Búro otyrysynda depýtattardyń bastamasymen ázirlengen áleýmettik kásipkerlikti damytý máseleler týraly zań jobasy I oqylymda qaraý usynyldy.

Atalǵan zań jobasy elimizdegi áleýmettik kásipkerlikti damytýdyń tetikterin zańnamalyq retteý jáne júıelendirý maqsatynda ázirlendi.

Sondaı-aq, aldaǵy jalpy otyrysta salyq jáne búdjetke tólenetin basqa da mindetti tólemder týraly Salyq kodeksine zańnamalyq túzetýlerdi engizetin zań jobasy I oqylymda qaralmaq.

Sonymen qatar, depýtattar nazaryna birqatar ratıfıkasıalyq zań jobalaryn qaraý usynyldy. Olar: Qazaqstan men Ázerbaıjan arasyndaǵy kóshi-qon salasyndaǵy yntymaqtastyqqa qatysty kelisim jáne Eýrazıalyq ekonomıkalyq odaq týraly shartqa ózgerister engizý týraly hattama.