Májilis depýtaty Elnur Beısenbaev jýrnalıs Nartaı Aralbaıulyna bergen suhbatta qoǵam belsendisi Janbolat Mamaı týraly "ol saıasatker emes, al kótergen bastamalary popýlısik áreketten ary aspaıdy" dep aıtty.

– Saıasatker degen máseleni sheshýshi adam nemese naqty sheshetin joldaryn kórsetetin adam. Mamaı ne usyndy? Onyń Dempartıasynyń baǵdarlamasyn oqydyńyz ba, kózben kórdińiz ba? Kredıttik amnıstıa júrgizý kerek degendi aıtyp júr. Halyqtyń nesıesin tolyq keshirý kerek deıdi. Bizde ondaı múmkindik bar deıdi. Kim keshiredi ony, bankter keshire me? Al bankterdiń sheteldegi qaryzdaryn sosyn kim keshiredi? Bizdiń bankter halyqqa nesıe berý úshin shetelden ózderi de nesıe alady. Ony sosyn kim tóleıdi, Janbolat qaltasynan tóleı me? Saıasattan alystaý adamdardy osyndaı isimen qasyna tartyp, top uıymdastyrý dep baǵa beremin, – dedi Elnur Beısenbaev suhbat barysynda.

Sondaı-aq ol Janbolat Mamaıdyń Nur Otan partıasy tóraǵasynyń birinshi orynbasary Baýyrjan Baıbekke qatysty jarıalaǵan vıdeomaterıalyna qatysty da pikir bildirdi. Buǵan deıin B.Baıbek J.Mamaıdyń aıyptaryn teriske shyǵaryp, ony jaǵylǵan jala ekenin aıtqan bolatyn. Qoǵam belsendisin sotqa beretinin de resmı málimdegen..

– Janbolat Mamaı Baýyrjan Baıbekke qatysty taǵy bir vıdeo shyǵaryp, ony debatqa shaqyrypty. Bul sasqan úırek artymen júzedi degenniń keıpi. Qandaı debat, adamǵa jala japtyń ba, endi sottyń aldynda jaýap ber. Aıtylǵan sóz – atylǵan oq. Zań saıasatkerge de, qarapaıym adamdarǵa ortaq, – degen E.Beısenbaev Janbolat Mamaıdy debatqa shaqyryp, kez kelgen taqyrypta sóz talastyrýǵa daıyn ekenin málimdedi.

Demokratıalyq partıa bastamashyl tobynyń jetekshisi Janbolat Mamaı pandemıa kezinde halyqtyń ál-aýqaty nasharlap ketkendikten, bir rettik nesıe amnıstıasyn jarıalaý bastamasyn kóterip júr.

B.Baıbek-J.Mamaı teketiresi belsendiniń NurOtan partıasy tóraǵasynyń orynbasary týraly eki tilde vıdeomaterıal jarıalaýynan bastalǵan. Janbolat Mamaı ol jerde UZUN Qulaq telegram kanalynda, ashyq derekkózderde, birqatar baspasóz betterinde jarıalanǵan aqparattardy, derekterdi negizge alyp, B.Baıbekti Almaty ákimi bolyp turǵanda "búdjet aqshasyn "jep" mıllıarder atandy" dep aıyptaıdy. Buǵan jaýap retinde B.Baıbek NurOtan partıasynyń eks-depýtaty, búginde youtube jelisinde vıdeoblog túsirýmen aınalysyp júrgen Táńirbergen Berdońǵarǵa suhbat berip, oppozısıonerdiń aıyptaryn teristep, ony sotqa beretinin málim etti. Munan soń Janbolat Mamaı Qazaqstan soty ózin jyǵyp beretinin aıtyp, Baıbekti tikeleı efır rejıminde ashyq debatqa shyǵýǵa shaqyrǵan.